藍奧議男曲終人散，在此祝藍鑽兄鵬程萬里。石兄飛出南澳以南重返校園，湊子女為樂，不知幾得人羡慕。筆者過幾日送把7呎長劍過佢，等呢位體育版秋官得閒係樓下花園，播下《楚留香》練練劍。
做人最緊要睇得開，好似前晚歐聯皇馬又製造笑彈啦！話說C朗賽後向電視台晒足踝，嘩，一灘血！原來慘食薩格勒布球員鞋底餅。呢位帥哥同助教卡蘭卡之後透過傳媒發炮，批評球證冇保護佢哋，由得對方球員傷人咁話。最搞笑係，《馬卡報》即刻展示上季歐聯比比伸丹尼爾張相，同C朗食鞋底餅張相幾乎一樣，幾邪呀！
西班牙傳媒暗寸球證
當然《馬卡報》想寸球證，上次比比就食紅牌，今次就放過薩格勒布球員，算點先？不過筆者睇住呢兩張相，當堂笑出嚟，心諗：「知痛嘞咩?！」上次丹尼爾避得過，皇馬上下同支持者笑佢做戲，仲逐格睇分析相差1毫米冇踢中，要幾凉薄有幾凉薄。家輪到自己中招，就識得叫痛，尋求球證保護啦咩？
C朗全場畀對方球迷噓，賽後話係自己靚仔、有錢兼好波，所以受人嫉妒喎！點解有齊以上3大特徵，就一定要畀人噓，而唔係畀人讚呢？C朗成日睇網球同NBA，唔通費達拿、米高佐敦出親場就畀人噓？只有恃靚行兇、恃才傲物、攞錢撻人嘅人，先至會被人鬧啫。
話說回頭，《視而不見》昨日篇專欄一出，隨即係網上廣傳，fb仲有行家、fans轉載同留言，睇到筆者鼻都酸埋。呢嚿頑石有咁多粉絲，都不枉咁多年嘔心瀝血撐藍軍，身為同事都替佢開心，不過就替讀者可惜啦！
文：法比奧