啱啱喺威尼斯影展憑許鞍華電影《桃姐》攞咗影后嘅葉德嫻（Deanie），返港後經過幾日休息噚日再出動，佢素顏現身，着白色polo恤、短白褲加短襪凉鞋，背囊掛心口，個look都幾平民。
心情大好
Deanie姐由一名男助手陪同去中環ifc買鞋，相信係準備出席今晚嘅活動，Deanie姐行咗幾個鐘就揀咗對高踭鞋。一向嚴肅嘅Deanie姐噚日心情大好，俾一班記者追訪都冇黑面，仲好和善咁叫記者小心。
行到咁上下，Deanie姐又去咗附近嘅樓上舖繼續揀鞋，今次又俾佢買到另一對鞋。諗住Deanie姐夠皮之際，佢竟然行去名店Joyce再作戰，一班員工見到影后駕臨當然落力招呼，Deanie姐再試咗差唔多一個鐘，但今次就買唔到嘢，跟住Deanie姐就去咗一幢商業大廈食飯。