林峯多次失落視帝寶座，無綫今年先後推出多套林峯劇集，似有意造就佢成為今年視帝。繼《談情說案》才貌相全嘅神探科學家，近日推出新劇《不速之約》，劇中佢演魔鬼，加上今次同福將歐陽震華（Bobby）、楊怡等人合作，相信會增加佢問鼎今年視帝寶座嘅機會。
自吹自擂讚新劇
前晚林峯同一眾《不》劇演員包括Bobby、楊怡等人到九龍灣一齊收睇劇集播出，林峯有大批fans撐場，佢仲扮魔鬼出現，佢仲話連屋企人問劇情都唔肯講，林峯話：「中秋節嗰日同屋企人一邊食飯，一邊圍住睇套劇，佢哋猛咁問劇情，我話我唔會講，等你哋自己發現先會嘩出嚟。」
講到咁勁，係咪有信心攞獎？林峯無奈咁話：「唔好問我呢啲，最開心係大家都會追睇個劇，觀眾fans又會追問我劇情，希望遲啲出街啲人會叫我魔鬼，咁證明大家有留意，獎唔獎？呢啲根本唔係最重要，觀眾反應先係畀演員最大鼓勵。」