古語有云：五十而知天命，月底便50歲生日的劉德華，當然知天命，他前晚舉行齋宴賀壽，群星陪慶生，出爐威尼斯影后葉德嫻（Deanie）前日返港即出席派對，還大方送上有錢都買唔到的獎座作壽禮，華仔笑言要保存48小時沾旺氣，然後物歸原主。
一向保養得宜的劉德華本月27日50歲牛一，他前晚在亞洲國際博覽館與fans舉行「50年不變情濃夜宴」，提早慶生日，人緣甚佳的華仔獲群星出席慶賀，現場星光熠熠，最高興莫過於華仔獲真假媽咪到賀，正牌劉媽媽看到兒子備受愛戴，深感安慰，至於視華仔如親子的葉德嫻日前憑電影《桃姐》榮登威尼斯影后，前日凱旋返港，晚上即帶着獎座現身，並打算把獎座作生日大禮贈華仔，壽星仔笑言只肯過手癮，保存Deanie姐的獎座僅48小時。
嫻姐透視裝唱《明星》
華仔特意選前晚中秋佳節與fans聚會兼慶生，老友黃日華夫婦、苗僑偉夫婦、曾志偉、李克勤、錢嘉樂、林家棟、湯鎮業、黃秋生、谷德昭、歐陽妙芝母子等紛紛撐場，人月兩圓的佳節，華仔雙親也到場，美中不足是華嫂朱麗倩仍繼續隱形，未有與眾同樂。現場筵開150席齋宴，眾fans輪流上台表演助興。
壽宴高潮莫過於出爐威尼斯影后Deanie姐出場，她穿上華仔送贈的黑色透視裝，盡現高貴氣質，她也技癢在台上唱出首本名曲《明星》，Deanie姐還慷慨送出影后獎座給華仔賀壽，她遞上獎座，華仔立即耍手擰頭：「No、no、no，呢個（獎座）對於你嚟講好有意義，係屬於你嘅，最多擺喺我度兩日，再還番畀你。我會努力，有一日希望我可以送畀你。」
華仔接過獎座，馬上叫重，Deanie姐體貼說：「等我幫你。」這對銀幕母子在台上大晒溫馨，Deanie姐大讚華仔說：「佢係一個好勤力嘅人，冇佢就冇呢部戲，有佢我先攞到呢個獎。」
「最好攞埋最佳電影」
華仔期望Deanie姐憑電影《桃姐》再下一城，在香港電影金像獎登上影后寶座，Deanie姐說：「我希望華仔攞影帝，最好《桃姐》攞埋最佳電影。」
另外，看到來自各地歌迷的熱情祝福，華仔眼紅紅，他感觸說：「我50歲嘞，我唔知道我可以唱到幾歲，但係未來仲有好多日子，你哋咪使旨意離開。」擅於搞氣氛的曾志偉帶領fans高舉雙手，承諾愛華仔一生一世，華仔見狀又感動到眼濕濕。
志偉其後跟錢嘉樂上台，邀請李克勤、林家棟和黃秋生等大玩《星星同學會》，眾人以假如我是劉德華做話題，克勤先說：「我知華仔鍾意買嘢，佢鍾意唱歌就買錄音室，鍾意拍戲就開電影公司，如果鍾意拍劇，最好梗係買電視台，咁樣大家都開心，多好多嘢睇。」
Sammi：係我學習目標
黃秋生建議華仔買一日銅鑼灣，他解釋：「咁樣華仔就可以同太太去行街拍拖，路人全部係fans，咁咪唔使擔心，佢哋又可以見到偶像。」華迷聽到這個提議，全場尖叫拍掌和應。秋生表示大家應改口不叫華仔「老大」，他說：「應該叫佢劉德華共和國總統，歌迷係國民。」曾志偉笑言要出任秘書長。此外，鄭秀文（Sammi）、鞏俐、成龍、許鞍華、馮小剛、吳君如和林子祥等前晚未有赴會，但也預先拍下恭賀短片給華仔，Sammi鬼馬說：「恭喜華仔80大壽，華仔一直係我學習目標，希望佢越嚟越瘦，越嚟越fit！」
撰文：丁寧