連續四日，全國人大常委范徐麗泰揸住支「挺唐」旗係咁fing，fing到大家以為范太恍如唐英年嘅選舉揸fit人。終於，范太知道自己講得太多太膩，噚日以「市民勸我停止」為由，決定「收嗲」，但八方聽聞，范太頓發「封口令」，背後亦有唐營嘅政治計算，目的無非唔想益咗梁振英，令佢攞到任何同情分。
稱收到電郵籲收口
政客喺公開場合，講唔講嘢、講幾多、講乜嘢、點樣講、一切都計過度過，你估真係「是但噏」咩？呢幾日，政治新聞離不開一個范太，佢嘅挺唐言論，唔使重溫。
范太噚日上午出席環保團體搞嘅「執垃圾」活動，八方見到佢對住啲「垃圾」笑到見牙唔見眼，知道佢挺唐心切，所以再去刺探佢點睇啲特首選情，點知佢一口拒絕。佢話：「我收咗好多e-mail叫我唔好再講喇！」
有記者追問佢，係咪唐唐叫佢唔好再講。佢顯得好勞氣，擰轉頭話：「絕對唔係，我都話冇同佢傾過偈囉！」怒氣冲冲乘車離去。到咗下午，范太出席另一節目，見到記者等佢等到變人乾，但依然硬着心腸封口。
「唔使咁快插死CY」
有唐營中人同八方分析，范太係重量級人物，連日以來不斷挺唐嘅言論已經over咗，而唐英年民望插水，再去咁樣「讚唐貶梁」，隨時激起反彈，民情隨時同情弱勢嘅梁振英，冷不防CY拉走部份有票在手嘅選委支持。
唐陣營亦有另一盤算，是范太背後有一班「中央大紅人」，例如前律政司司長梁愛詩，若這班「大紅人」待唐唐辭職宣佈參選後，才攜手出來「拱照」唐唐，可收事半功倍之效，穩住愛國愛港陣營。所以唐營認為，「照挺唐唐，但唔使咁快插死CY」。
不過，范太唔講啫，有人就繼續口多多。貿發局主席蘇澤光被問到點睇唐唐同CY做下屆特首。佢話港澳辦主任王光亞早前指，特首有三大條件，分別係愛港愛國、市民認受性高以及有豐富行政經驗。JackSo認為，前兩個要求梁唐二人都合格有餘，故誰勝誰負，就要取決於行政經驗，又指有力管理公務員團隊係非常重要。JackSo撐邊個，心照便可。
mailto:[email protected]