「嫖、賭、飲、蕩、吹」，5大惡習求其衰一瓣，都會嚴重影響人生，尤其係靠體力搵食嘅英超球星；英國電視台Channel4，就準備喺英國時間周一晚爆大鑊，喺一個叫《Dispatches》節目中，開名大爆一名可卡因測試呈陽性反應嘅英超球員，睇嚟唔少身有屎球星都人人自危。
足總球會同涉隱瞞
電視台未開名前，工作人員就事先畀啲貼士大家，話呢位球星最近先涉及數以百萬鎊轉會費嘅交易，但舊球會就隱瞞佢吸毒嘅前科，新球會仲未知佢好呢味嘢。我求大俠相信同好多球迷都好驚訝，事關英足總其實應該有一系列抽樣測驗機制，無論比賽前後、甚至練習期間，都可以突擊檢查球員嘅尿液樣本，應該可以防止球員吸毒。
點知節目仲有驚人發現，就話其實英足總同本身球會，都知道數十名麾下球員都有毒癮，但就採取隱惡揚善嘅手法，間接縱容球員持續呢個壞習慣。球會往往得知突擊檢查對象係癮君子，就刻意使開球員，《Dispatches》節目就聲稱，由07年4月至10年8月，有240個藥檢測試中，因為球員沒有出現喺練習場，結果被迫取消測試，事件亦不了了之。世界反興奮機構發言人大衛荷文就講，英格蘭足總必須公開有關測試嘅報告，如果成日隱瞞，只會令問題更嚴重。
過來人加斯居尼奉勸
其實英超球星吸毒，並唔係新鮮事；好似英格蘭新晉中鋒安祖卡路爾，上年仍效力紐卡素時，就涉及與兩名妓女「3P」，兩名妓女更被偷拍到懷疑吸毒，只是安祖卡路爾未有涉及在內。而前車路士球員梅度，同前熱刺、拉素中場加斯居尼，都因為吸毒而前途盡毀。加斯居尼語重心長咁講：「我敢保證，英超球員吸食可卡因，絕對不是少數，由我當球員都現在，情況都十分普遍，只是他們千方百計掩蓋罪行。希望球會及球員工會，要好好協助有問題球員。」
毒男球星背景資料
1.效力英超球隊
2.剛涉數百萬鎊轉會交易
3.新球會並不知道此子有吸毒惡習
資料來源：英國《太陽報》