王冬勝宣佈攞你命三千後，玩縮沙忽然缺席主禮活動，已成官場笑話。昨日本地傳媒廣發專訪文章，仍然是官腔文章LineToTake，甚麼前景不明、成本效益、未雨綢繆、早好過遲一大堆官樣文章，完全冇針對本地輿論質疑：包括點解係香港、點解咁多人。我相信公關頭領早已預備好標準答案，CEO不理外界民情變化，睇住條LTT照本宣科。
今次裁員處理唔只失當、仲係失禮。眾所周知銀行業做生意方式大同小異，冇話邊個Banker係天降英才，創意過人，做帶領公司走出新局面英雄。銀行優劣之分在於決策時機，比人睇得準、做得快，攞到先行者優勢。今次攞你命三千出台時機之拙劣，真係一地眼鏡。
裁員在挺港招數後 顯Arrogance
滙豐成立至今都係靠中國市場食糊，清末睇到中國積弱，英商大舉進軍中國市場，幫清廷融資處理外債係大生意。當時鈔票上「滙豐」兩個中文，乃出自曾國藩之子、曾任駐英大臣的曾紀澤之手。1949年後滙豐被迫離開中國，香港借冷戰西方圍堵中國形勢大做中間人生意，60年代變身世界工廠、貿易中心、地產金融中心，滙豐係跟住香港呢個勢上。冇香港冇滙豐係歷史事實。
今次大裁員發生在中央支持香港做中國國際金融中心之後，李克強挺港36式剛公佈，滙豐就在香港大裁員，如果唔係天真與儍，只有一個字解釋就係Arrogance。更可笑係剛好是煲呔訪英出席論壇，與貿易大臣兼前滙豐大班葛霖、現任大班范智廉同台。你估吓今次范智廉會否避開唔見面，連貿發局主席JackSo主辦餐重頭晚宴都唔去，若見到煲呔又會講乜嘢？
今次香港大裁員無逼切及合理性，屬討好投資界動作，但卻又事前準備欠奉，時機錯亂，選擇了突發高調方式進行。這反映了今日滙豐已不將香港放在眼內，包括官府在內。
大家真係要睜大眼睇吓王總裁手起刀落炒人走時有乜特異功能，可絲毫不損全身而退。
添馬男