熱刺領隊哈利列納話為咗令陣中嘅荷蘭中場雲達華治（圖）專心打英超，兼且因為對方因大腿撕裂而養傷至10月頭，於是冇幫佢註冊打歐霸盃。點知雲達華治嘅康復速度比預期快好多，仲有望喺下周日對利物浦場英超上陣，加上哈利列納係先斬後奏，先前一句通知都冇，所以雲達華治就嬲爆。我求大俠真係唔明哈利列納諗乜，註咗冊都唔一定要派落場，所以佢嘅解釋真係好牽強；更何況，個歐霸分組賽打到12月中，雲達華治照計最多都係打唔到頭兩場，仲有4場係踢到，睇嚟哈利列納啲數口都幾差喎！唔該哈利列納下次drop人嘅時候，搵個好啲理由，無謂搞到自己咁面懵啦。