敏妮一直想去西藏、意大利，同俄羅斯幾個地方旅行，其實呢啲地方都唔難去，只要有時間，偏偏最難解決就係時間問題。死黨Chloe前排去完俄羅斯出差，特登Email啲相同敏妮分享，唔知係咪太凍，所以啲相鬆郁矇。
Chloe最鍾意就係食，但食極唔肥（所以敏妮好鬼憎佢！），Share嘅相（圖）亦都同食有關。佢最深印象係食飯時擺滿一枱嘅冷盤，原因唔係好食，而係外面已經凍冰冰，食嘅嘢又係碟碟凍冰冰，完全引唔起食慾。伴隨凍冰冰冷盤係一支Vodka，敏妮估計，因為飲完Vodko成身㷫晒，所以要食冷盤降溫。由於冷盤冇人吼，所以隨即上主菜，熱辣辣巨型串燒！見Chloe介紹時咁眉飛色舞，呢盤串燒應該對辦。
暫時仍然冇時間兼搵唔到伴去俄羅斯，所以Chloe帶敏妮去「老蘭」嘅Balalaika食俄菜頂住先。呢度最出名係個「冰室」，畀人入去飲Vodka，敏妮怕凍，咪搞！Chloe二話不說，Fur都冇着就衝咗入去。
至於食物方面，當然冇提唔起食慾嘅凍冰冰冷盤，樣樣食物都好「香港化」，否則間舖都幾難生存。為咗比較吓移民香港嘅俄菜，同當地俄菜嘅分別，所以叫咗盤串燒。就正如Chloe所講，燒烤嘢食度度都咁上下，但話晒主題餐廳梗要搞啲花臣，所以將盤串燒隊到你面前點火，唔食得都嚇得吓嘛！
溫敏妮
http://wanmanli.com/blogs/