睇開Blu-ray，見唔少陳年舊片經數碼修復後，完全煥然一新，近年Game界都吹起「HD」熱潮，一堆經典巨作紛紛HD化，最新有《戰神》PSP兩大作，合輯一碟喺PS3推出，升呢1080P全高清再加杜比5.1靚聲效，最有誠意係3D化，光頭戰神一對招牌鏈刀，插住牛鬼蛇神再打圈狂Fing，真係隨時玩到人陀陀擰。
記者：陳國輝
撲埋身壓迫震撼
戴3D眼鏡打機都唔係第一次，不過《GOW》認真要讚！睇完Trailer，可能你又以為最立體嘅又係字幕，由於佢以第三身視點操控角色，所以跑步、跳躍，甚至轉動鏡頭時，見住主角彈嚟彈去，立體感特別強烈；但講到最震撼，應該係敵人衝前撲埋嚟嗰刻，遇正巨大單眼獸，你可以擒上身不斷怒劈，尤其「QTE」後嘅斬殺演出，絕對充滿壓迫感！主角戰神克雷多斯最興將鏈刀捆綁怪獸係咁Fing，搞到鏡頭不停旋轉，打得耐3D真係有啲暈。
杜比5.1殺聲四起
高清加3D固然係今集重點，但既然移植到PS3，聲效方面也應有同步改進！呢次《GOW》支援Dolby5.1以及DTS兩種高清音效，當主角遇上一大批敵人，四面八方向佢攻擊嗰陣，5.1環迴聲效就可大大發揮，感受一下「殺聲四起」嘅戰場氣氛。另外，主角喺遊戲內也特別鍾意「玩火」，加埋兵器清脆碰撞聲、巨獸怒吼，都可用嚟測試佢音效有幾掂。至於討論區班Fans最關心嘅畫質問題，放心，HD化後已可當成新嘅PS3遊戲，一定令你滿意。
講番遊戲內容，佢除咗結合PSP版《GodofWar:ChainsofOlympus》以及《GodofWar:GhostofSparta》呢兩集內容，仲提供埋中文字幕，如果係第一次玩《GOW》系列，對諸神互相殘殺就有更深入了解。
《GodofWar:OriginsCollection》
平台：PS3
類型：動作冒險
畫面：1080P+3D
音效：Dolby5.1/DTS
人數：1人
售價：$258
腦龍亂入
爆一次機攞白金盃
同屬舊作HD化，《戰神》比《生化危機：聖女密碼》實在有誠意得多，由播片到貼圖，睇得出係認真處理過，玩完一輪，你會驚嘆：原來舊有PSP版場景咁偉大，只係屏幕所限大家感受唔到啫。新版加入白金獎盃（呢點又叻過《生》），最高難度獎盃毋須去到終極神級，即係一開波揀困難模式，理論上爆一次機就攞到白金盃，毋須反覆打爆幾次，正！
高清《巨像》擒得爽
想翻舊脹，又何止得《GOW》一隻。記得05年曾推出專玩「以小吃大」嘅《汪達與巨像》，個子細細嘅你，每次都要由Boss腳趾尾爬到上天靈蓋，然後再一刀拮落要害，諗起都爽！事隔六年，佢連同另一名作《ICO》，齊齊HD回歸PS3，特別一提係隻Game勁多山水、園林、歷史遺蹟等背景，高清顯示下更宏偉壯觀，肯定值得Fans再次翻煲。
《ICO&汪達與巨像》$628