最風騷：拜仁慕尼黑
德甲班霸拜仁近況大勇，近3場聯賽大勝對手，並且不失1球，包括上周六晚主場大派弗賴堡7隻光蛋。射手馬里奧高美斯腳風超順，仲勁過帽子戲法都起孖的朗尼，該名德國球員上周對凱沙羅頓連中三元，而今周更加大四喜，近兩輪入7球。
最玩嘢：巴塞隆拿
地上最強的巴塞衰輕敵，結果上周六晚遭皇家蘇斯達逼和2:2，痛失2分。教練哥迪奧拿以為皇蘇好恰，該仗收起美斯、恩尼斯達、韋拿和佩奧爾等主將，但原來皇蘇戰鬥力強勁，上半場落後兩球都追得成平手。哥帥打算留力打歐聯，誰料玩嘢玩出禍！
最抹一額汗：阿仙奴
開季3仗得1分、狀態低迷的阿仙奴終於打開英超勝利之門，主場小勝史雲斯1:0，但過程相當驚險。阿仙奴前鋒把握力差，全場19次射門只得4次中目標。全靠對手門將禾姆送大禮，艾沙維射空門，兵工廠才拿到3分，相信領隊雲格都抹一額汗。
最靚金球：吉田麻也
周日晚荷甲，芬洛主場跟燕豪芬踢成燦爛的3:3比賽當中，出現世界波！在53分鐘，芬洛一次右路傳中，日本左閘吉田麻也衝入禁區接應，並使出戴志偉的絕技倒掛金鈎，力度十足，應聲入網。一球成名的吉田麻也現年23歲，去年由日聯的名古屋鯨魚加盟芬洛，而在早前的國際賽期，他亦有入球，呢期紅爆！
精采一刻
上周六英超，曼城主場贏韋根3:0，射手阿古路連中三元。韋根門將艾哈比斯（前）無奈地一次又一次從網內拾回皮球。法新社
討論區金句
保頓vs曼聯
「呢場波贏咗仲開心過上場贏阿仙奴，雖然入波少咗，但係以整體踢法去入波就多咗，上場超多世界波，而今場防守又穩咗。」
皇蘇vs巴塞
「Hea踢一定出事！攞嚟衰！美斯可以企喺場度，但一定唔可以放後備！」
資料來源：香港討論區