出爐威尼斯影后葉德嫻（Deanie）昨日凱旋返港，即風塵僕僕地出外裝身扮靚，趕赴劉德華昨晚50歲生日派對，在中秋夜跟一向視作親生仔看待的華仔慶祝生日，母子團圓。Deanie揚言將影后獎座送給華仔做生日禮物，答謝華仔開拍《桃姐》出錢又出力。
息影11年的葉德嫻復出拍攝許鞍華執導的《桃姐》，結果一擊即中，在日前威尼斯影展中撼低奧斯卡影后琦溫絲莉（KateWinslet）封后。昨日中午1時許，63歲的出爐影后Deanie凱旋返港，吸引過百傳媒到場採訪，電影公司找來代表獻花。雖然Deanie搭了10多小時飛機，但臉上未有一絲倦意，笑容滿面地接受各方祝福，又360度轉身讓傳媒拍照，十分識做。
親手送上兩個獎座
談到得獎感受，Deanie笑說：「Unexpected，如有神助，對我嚟講係一個鼓舞。我比較抽離，唔想飄吓飄吓，獎唔係我一個人，係大家群策群力。生殺大權喺許鞍華同華仔身上，多謝佢兩個畀機會，覺得我勝任做桃姐。」華仔有否致電恭賀？Deanie說：「佢sendmessage畀我話：『hehehe，hahaha，錫晒你。』」問到如何慶祝時，Deanie自言為人比較抽離，一切皆會平常心面對，今次攞獎後也不會加片酬。
Deanie多年來與華仔合作演母子，感情一向深厚，今次Deanie攞獎的電影《桃姐》，華仔不但演出，更出錢出力有份投資，所以昨晚華仔在亞洲國際博覽館延開138圍，跟全球歌迷提前慶祝生日，Deanie無論多勞累也抽空出席，連今次威尼斯影后獎座都送給華仔做生日禮物。問Deanie送華仔甚麼禮物時，她笑道：「呢個獎係送畀佢嘅，仲有個人道獎，會包埋一齊送畀佢。」
Deanie表示今次因為是與華仔合作，所以演起來更加投入，又謂自己與華仔演戲已去到一個昇華地步。問她未來會否再跟華仔合作拍攞獎戲？Deanie說：「我記得八、九年前喺康城撞見許鞍華，同佢講起某一個歌星，個歌星想唱一啲歌係攞獎，係要topten。我記得我講過一句說話，就係如果你刻意去做一件事，永遠唔會靚。我話緊我自己，如果想攞獎，拍啲攞獎戲，我唔會囉！唔通想發達就拍啲發達戲咩！有冇吖？我唔想諗咁多去做，真係要有誠意做一件事至得，就算冲凉都要有誠意，唔可以求其，好似過冷河咁。」今次攞獎後會否對攞金馬獎和香港電影金像獎信心大增？她笑說：「唔可以咁講。」
回家最想冲凉執屋
除拍戲外，Deanie未來還想嘗試演舞台劇和音樂劇，她笑說：「舞台劇未掂過，音樂劇更想做，想趁自己把聲未走，加上自己仲有啲氣力。」問她若演舞台劇、音樂劇，最想跟哪些人合作？她說：「最緊要夠勤力、熱愛音樂、愛演戲。」
Deanie一向愛清潔，所以記者問她回港後最想做的事，她直指是冲凉，回家後最想執屋，因香港污染大，空氣中亦有很多塵埃。問她最掛住香港甚麼時，她笑說：「最掛住屋企個廁所，因為好多時會flood。」另外，Deanie指電影在香港是一門生意、是商業投資，跟外國不同，故希望香港政府能對香港電影業增加資助，拍攝一些警世電影，不用香港電影人經常為資金而四出奔走。
訪問後，Deanie乘七人車先送華仔公司高層陳佩華返寓所，她又桃姐上身般為陳搬行李，至下午1時15分才返抵自己太子道西寓所。落車時，Deanie繼續桃姐上身搬三大篋行李落車，並笑說：「你睇我幾勁！」繼而又叮囑記者說：「你哋食飯啦，我返上去唞吓先。」
然而，Deanie回家不夠一粒鐘又即出動，她先到銅鑼灣取華仔為她專程訂做的衣服，繼而到中環改衫，再到威靈頓街整頭髮。臨上髮型屋時她又叮囑記者說：「天口熱，飲多啲水呀。」Deanie理髮到下午5時許離開，然後直駛往博覽館跟華仔慶祝生日及慶中秋，人月兩團圓。
傳華仔夫婦補擺酒
昨日來自世界各地的fans專程來港為華仔賀壽，不少人手上還拿着鮮花準備送給Deanie賀她攞獎，華仔一直支持的傷健運動員蘇樺偉，昨晚則在會場外為華仔天地派宣傳單張。昨晚向華強及太太陳嵐到賀，揚言送6位數字現金給華仔做善事，有傳昨晚華仔與太太朱麗倩補擺喜酒，向太說：「呢啲你問番佢啦。」華仔家人會否到場？向華強說：「父母會到，華仔好少搞到咁大。」記者笑指似擺喜酒，他說：「今晚當係。」惟向太即澄清道：「要華仔當係先得，你哋唔好亂寫，我冇講過。」向華強又指昨晚為華仔慶生、賀Deanie攞獎及賀中秋，實為三重慶祝。
採訪：楊潔雯、譚倩宜
攝影：陳慧安
有情歲月：29年母子情
葉德嫻與劉德華戲內戲外都建立了深厚的母子情，事實上，華仔初出道時，Deanie姐已扮演其母親角色，換句話說，她扶持着華仔在影圈茁壯成長。
《獵鷹》（82年）
李添勝監製的無綫劇集，華仔首次擔任主角，Deanie姐飾演其母。
《法外情》（85年）
華仔飾演孤兒院長大的年輕律師，後來為Deanie姐飾演的老妓女打官司，最後獲悉她是其生母。
《法內情》（88年）《法外情》續集
《法內情大結局》（89年）《法內情》結局
《與龍共舞》（91年）
華仔戲中曾為Deanie姐當廉價勞工，後來Deanie姐成為華仔的外母。
《廟街十二少》（92年）
Deanie姐扮演華仔養母，吳孟達則是華仔養父。
《天長地久》（93年）
華仔與劉錦玲青梅竹馬，Deanie姐則演劉錦玲的母親。
《1/2次同床》（96年）
華仔與關之琳演一對，Deanie姐演之之母親。
《黑馬王子》（99年）
華仔扮演旺角小混混，Deanie姐飾其母。
《桃姐》（今年）
Deanie姐扮演服侍華仔的女傭，兩人情同母子。
資料來源：《蘋果》資料室
