邊個想「入閘」參加下屆特首候選人，點可以唔同民建聯打聲招呼先？民建聯李慧琼向三位疑似候選人，包括梁振英、范徐麗泰、唐英年發「英雄帖」，邀請佢哋落區聽民意，但Starry早前就安排梁振英逼喺幾百呎嘅舊區單位，同班公公婆婆講點樣面對區內殯儀業越做越大，噚日Starry就安排范太去咗相當富貴嘅佐敦木球會會所，同班身光頸靚嘅少數族裔搞TeaParty，講吓種族歧視。
八方問Starry兩位特首黑馬「貧富懸殊」，係咪偏心先？Starry解釋，其實佢只係book唔到地方，所以先至喺木球會搞呢場Party，絕對冇偏幫邊一位。至於唐唐呢？Starry話，佢邀請唐唐去睇舊區劏房同僭建，但係唐唐話遲啲再約喎。八方相信，唐唐都係等自己一辭職，就即刻落區同議員做騷，齊齊抽水。