英超升班馬以往不時都可以畀到球迷驚喜，好似之前嘅新特蘭、富咸同埋雷丁，喺升班嗰季都創造過唔少爆冷戰果；不過，近年就好少有呢支歌仔唱，而綜合今季英超升班馬嘅表現，就更難寄多厚望。以昆士柏流浪（QPR）迎戰紐卡素場英超夜波為例，主隊成場機會多到不得了，但弊在前鋒保夫萊特敗家，結果只能打和0:0。
喺今季3支英超升班馬當中，透過升班附加賽升上嚟嘅史雲斯，同埋英冠亞軍諾域治，都仲未喺英超開齋；其中史雲斯仲喺聯賽0入球，難怪史雲斯同諾域治被博彩公司威廉希爾列為1.57倍及1.67倍嘅降班大熱同次熱。
至於QPR，由於佢哋係英冠冠軍，之前已打開聯賽勝門，加上自大馬商人費南迪斯入主後又大事擴軍，所以大家都對佢哋有啲期望；而喺周一迎戰紐卡素時，昆士柏又有新兵中場祖爾巴頓倒戈，所以稍為被看好。
胡禮仔祖爾巴頓算搶鏡
的確，昆士柏喺周一場波真係派出6名新兵上陣，而且仲全場取得主動，亦基本上佔到8、9成攻勢；新兵之中，中場胡禮菲臘斯同祖爾巴頓都頗為搶鏡，可惜，同樣係今屆新加盟（但係喺費南迪斯入主前加盟）嘅前鋒保夫萊特就唔爭氣，冇次機會把握到，結果打和0:0。連同今輪史雲斯同埋諾域治都係輸0:1，3支升班馬今輪都贏唔到兼零入球，令人失望。
老細有錢應該換前鋒
不過，賽後無論係昆士柏領隊禾諾克，抑或係中場祖爾巴頓定係胡禮菲臘斯，都滿意球隊嘅表現；成為昆士柏新領袖嘅祖爾巴頓仲話：「喺足球比賽要力保不失並唔容易，而且我哋仲有6名新球員上陣㖭！」話雖如此，身為前鋒把握唔到機會係死罪，既然新班主費南迪斯肯大灑金錢替昆士柏擴軍，唔爭在喺1月轉會窗重開之前，借個有級數嘅前鋒番嚟，幫昆士柏成功護級都好吖。