中環麗人總要有件Chanel鎮宅，難怪Chanel嘅創作總監KarlLagerfeld俾港女當神咁拜，喺時裝界有老佛爺稱號。今勻老佛爺玩過界，同瑞典玻璃製品公司Orrefors合作，推出一系列水晶器皿。
同得老佛爺合作，Orrefors都唔係二打六，長期為瑞典皇室提供玻璃器皿。至於一系列水晶器皿有杯有碗有花樽，全部由工匠吹製，顏色方面當然係老佛爺一貫嘅黑白透明。
先講花樽，3粒水晶波波頂起圓柱樽身，簡潔中見細節，賣1100歐元，即係萬鬆啲港銀。至於一系列酒杯包括香檳杯、葡萄酒杯、水杯，靚到似燭台，型爆大酒杯賣170歐元，大概千八蚊港紙。老佛爺嘅「聖杯」噃，唔貴！