今日係人月兩圓嘅日子，吳雨霏（Kary）亦趁機噚日迎月夜同金毛新歡夜蒲。至於早年反目嘅好姊妹何超盈同唐貝詩亦「破鏡重圓」，孖住去蘭桂坊消遣。
同拍拖4年網球王子洪立熙甩拖嘅Kary，上個月被發現識咗個金毛新歡，噚日凌晨2點幾，Kary同金毛新歡、林子祥個仔林德正（Alex）以及一男一女友人喺蘭桂坊夜蒲後離開。之後金毛揸部銀色平治載Kary同另一個男性朋友離開。其間Kary發現有傳媒跟住，竟突然喺Soho區落車，同金毛分道揚鑣。
Kary講明唔認
至於賭王千金何超盈早年被傳俾唐貝詩出賣搞到好友反目，但原來佢哋已恢復「邦交」，噚日凌晨超盈去到中環安慶台門口同唐貝詩及幾個女友會合。超盈見到其中一個女性朋友就好熱情咁擁抱，唐貝詩笑晒口同超盈傾偈，然後一齊去安慶台嘅夜店。不過，唐貝詩逗留15分鐘就急急離場。
Kary噚日喺將軍澳出席活動，對於被影到喺蘭桂坊媾仔，佢強調只係朋友，因簽咗新唱片公司，只想專心工作，Kary仲話：「就算再影到，我都只會話係朋友。」
