【第68屆威尼斯影展之淡薄名利】現年63歲的葉德嫻（Deanie）息影11年，甫復出接演的電影《桃姐》，昨日為她在第68屆威尼斯電影節贏得影后殊榮，她上台領獎時只作公式道謝，未有任何矯揉造作或擠淚交戲，一夜間成為國際影后無損一貫淡定。事後她暢談得獎感受，她表示不會過於高興，對生活也沒變化，不會有特別慶祝，可能吃個杯麪吧！
葉德嫻憑電影《桃姐》成為香港首位威尼斯影后，擊敗了奧斯卡影后琦溫絲莉（KateWinslet）及演技備受國際肯定的姬拉麗莉（KeiraKnightley）等強勁對手。葉德嫻更是繼19年前鞏俐憑《秋菊打官司》後，第二位華人女星奪此殊榮。她上台領獎時以意大利語說多謝，博得全場掌聲。
「拍完唔想入老人院」
在頒獎禮後的記者會，出爐威尼斯影后葉德嫻跟《桃姐》導演許鞍華、影帝麥哥法斯班德（MichaelFassbender）及評審主席達倫艾朗夫斯基（DarrenAronofsky）一同現身，獲得全場掌聲反應熱烈。
葉德嫻談感受時笑言：「自己老緊，拍完《桃姐》都唔想入老人院，所以返香港要賺多啲錢養老。」評審主席達倫艾朗夫斯基對《桃》片評價很高，他說：「這部片好感人，Deanie在戲中表現出類拔萃，想不到她的真人如此年輕、性感和美麗。」
Deanie在香港時間昨日凌晨回到下榻的酒店接受本報記者訪問，她的表現十分平靜，她說：「可能自己年紀大，所以得獎都唔係太激動，冇乜特別慶祝，自己唔飲酒，可能食杯麪啩！真係冇乜特別感覺，我都唔想特登生安白造啲感覺落去，可以講嘅係外國人好接受我哋黃種人嘅電影囉，唔只中國、香港，日本都係。」
得獎後冇感覺，驟耳聽落可能會覺得說話者帶點虛偽或自大，但說話出自Deanie口中，卻能感受她的真，她表示：「其實就算攞唔到影后，我都唔覺得遺憾㗎，電影拍咗就係拍咗，結果係交由評審去揀嘅，所以得唔得都冇乜感覺，如果我拍戲時演得唔好就有遺憾喇！」
「唔好成日喺雲上行」
Deanie之前只曾獲得過女配角獎項（詳見附表），今次於水都成為影后的確令她的演藝人生更加圓滿，問她可會覺得現在是她演藝生涯中的最佳時刻？她說：「我又冇咁嘅感覺喎，我只係咁啱遇到呢個角色而將佢演好，得獎嗰吓高興完就冇嘢㗎啦，都係好似平常咁生活，做人最basic係要咁，唔好成日喺雲上行。」說來說去，Deanie依舊心繫不在現場的「阿仔」劉德華，她說：「今次得獎係一個認同，亦都係一個交代畀華仔，咁小本嘅戲真係得佢夠膽投資，我真係好欣賞呢個小朋友，佢係不斷發放正能量嘅人。」她笑言要暫時與華仔分開一下，因為Deanie希望可跟其他演員合作交流，她說：「仲接唔接戲都係睇劇本啦，不過係都同其他人拍吓，唔好成日都華仔，觀眾都睇到嘔啦！」
談到華仔落選影帝，葉德嫻說：「參賽嘅人水準都好高，評分永遠會有自己喜好，最佳演員仲有其他因素，好似眼緣咁，我唔覺華仔係比人遜色，或者其他人好過佢。」
另外，Deanie接受內地傳媒訪問，她說：「精力冇以前咁好，以前可以喺屋企將傢俬推嚟推去，家反而唔得，好多事情做唔嚟，有心無力。其實呢件事係唔開心嘅，你問我可唔可以接受，唔接受都要接受。」
盼金馬金像再下一城
《桃》片稍後可能會報名參加台灣金馬獎和香港電影金像獎，問Deanie會否希望再下一城？她平靜說：「唔係你願意攞人哋就畀你吖嘛！如果能夠再攞到任何獎項嘅話，對我嚟講就係再一次俾人肯定。」Deanie坦言暫時未有新片請她演出，她說：「其實市場就係年輕人主導嘅，年輕人鍾意睇乜嘢呢？年輕人鍾意睇科幻片、搞笑同無厘頭嘅電影，呢部戲對佢哋嚟講太嚴肅嘞，嚴肅到會嘔白沫。投資者方面，除咗劉德華就係于冬嘞，仲有冇其他人敢做？我相信好難。如果成日都要食驚風散嘅話，肯定唔得，幾年食一次就差唔多，年年都咁食就唔好嘞。」她又稱希望能拍警世題材的電影。
葉德嫻昨日香港時間傍晚6時多離開威尼斯，準備乘機返港，她低調拿着獎座上機，臨入閘前更拿着獎座再讓記者拍照。她全程笑容滿臉，現場有洋漢認出她是出爐威尼斯影后，馬上邀她合照留念。葉德嫻笑言金色的獎座如世界盃一樣搶眼，拍了一會照片便收起來，她在機場上碰到新婚的賈樟柯夫婦不忘上前恭賀。
採訪：文國駿 攝影：陳俊強
話你知：老戲骨4奪配角獎
葉德嫻從影32年，參演電影逾50部，曾兩度獲封金像獎最佳女配角及兩奪台灣金馬獎最佳女配角。
年份：1979 參演電影：《林亞珍老虎魚蝦蟹》
年份：1980 參演電影：《第一類型危險》
年份：1981 參演電影：《執法者》
年份：1981 參演電影：《愛殺》
年份：1981 參演電影：《忌廉溝鮮奶》（第19屆金馬獎最佳女配角）
年份：1981 參演電影：《兩小無知》
年份：1982 參演電影：《提防小手》
年份：1982 參演電影：《摩登雜差》
年份：1982 參演電影：《拍拖更》
年份：1982 參演電影：《拖手仔》
年份：1983 參演電影：《第一把交椅》
年份：1984 參演電影：《神勇雙響炮》
年份：1984 參演電影：《第八站》
年份：1984 參演電影：《雙龍出海》
年份：1984 參演電影：《行錯姻緣路》
年份：1984 參演電影：《貓頭鷹與小飛象》
年份：1985 參演電影：《智勇三寶》
年份：1985 參演電影：《補鑊英雄》
年份：1985 參演電影：《夏日福星》
年份：1985 參演電影：《法外情》
年份：1985 參演電影：《花街時代》（第5屆香港電影金像獎最佳女配角）
年份：1985 參演電影：《歡場》
年份：1986 參演電影：《癲佬正傳》
年份：1986 參演電影：《再見媽咪》
年份：1986 參演電影：《雙龍吐珠》
年份：1986 參演電影：《老娘夠騷》
年份：1986 參演電影：《你情我願》
年份：1987 參演電影：《鬼新娘》
年份：1988 參演電影：《飛龍猛將》
年份：1988 參演電影：《法內情》
年份：1988 參演電影：《法律無情》
年份：1988 參演電影：《黑心鬼》
年份：1989 參演電影：《黑道福星》
年份：1989 參演電影：《法內情大結局》
年份：1991 參演電影：《魔畫情》
年份：1991 參演電影：《與龍共舞》（第11屆香港電影金像獎最佳女配角）
年份：1992 參演電影：《逃學威龍2》
年份：1992 參演電影：《藍江傳之反飛組風雲》
年份：1992 參演電影：《廟街十二少》
年份：1992 參演電影：《女黑俠黃鶯》
年份：1992 參演電影：《噴火女郎》
年份：1992 參演電影：《絕代雙驕》
年份：1993 參演電影：《黃蜂尾後針》
年份：1993 參演電影：《天長地久》
年份：1993 參演電影：《一代梟雄之三支旗》
年份：1994 參演電影：《洪熙官》
年份：1995 參演電影：《沒有老公的日子》
年份：1996 參演電影：《1/2次同床》
年份：1999 參演電影：《黑馬王子》
年份：1999 參演電影：《笨小孩》（第36屆金馬獎最佳女配角）
年份：2000 參演電影：《唔該借歪》
年份：2000 參演電影：《九龍皇后》
年份：2011 參演電影：《桃姐》（第68屆威尼斯電影節最佳女演員）
資料來源：《蘋果》資料室