我求大俠近排個個禮拜日朝早，都追睇三色台套《我的帥管家》，估唔到真人版會喺英超出現。話說曼聯嘅英格蘭國腳中堅里奧費迪南，為咗有多啲時間湊自己3個仔女同專心踢波，於是就計劃搵個男僕嚟照顧佢自己。
親自照顧3條化骨龍
里奧個細女迪雅喺今年5月出世之後，佢到目前為止都冇請保母，寧願同老婆麗碧嘉落手落腳照顧3條化骨龍。聽里奧身邊啲朋友講，佢係個家庭觀念好重嘅人，認為自己啲仔女應該自己湊番，唔應該假手於人。但係，佢要應付曼聯同埋英格蘭國家隊嘅比賽，又要處理場外嘅餐廳生意，本身經已好忙，加埋返到屋企要湊仔，忙上加忙，真係得閒死唔得閒病。
里奧一對手邊做到咁多嘢吖，於是佢就打算請個男僕，幫佢打點同處理佢果間喺柴郡、市值500萬鎊豪宅嘅家頭細務。據喺曼聯嘅知情人士表示：「里奧搵個人照顧佢生常生活同喺屋企幫輕自己，絕對係合情合理。佢要每一分鐘都陪住自己啲小朋友成長。」唔講你唔知，里奧雖然個大忙人，但就堅持朝朝送自己個5歲大囝囝羅蘭士同埋3歲大囝囝泰特返學。
有人服侍專心爭正選
喺《我的帥管家》套劇入面，飾演男僕嘅水琼Hiro又靚仔又做到嘢，照顧得佢女主人榮倉奈奈好周到。至於里奧計劃請嘅男僕有冇水琼咁靚仔，我求大俠就唔清楚，不過里奧喺英超屬於潮人一族，而且走型男路線，所以做得佢男僕嘅，肯定係有番咁上下「姿色」。
話時話，里奧家陣喺曼聯同英格蘭國家隊都再非必然正選，若然佢有個男僕幫佢打點吓啲屋企事，就可以專心一致同基斯史摩寧、菲爾鍾斯同加利卡希爾等後輩爭正選，對佢嚟講絕對係好事。