雨潤食品（1068）早前驗到隻有「瘦肉精」嘅豬，聽雨潤自爆，呢隻「瘦肉精」豬係來自生豬供應商所，唔知雨潤有無諗過搵新供應商呢？如果想，不妨考慮吓向剛剛做咗雙料首富嘅三一創辦人梁穩根買豬。
華華講真㗎！事關華華喺上周到昆山參觀三一嘅廠房，知道梁穩根聘請嘅員工過萬，梗係要有自己飯堂向員工提供伙食，佢哋認真到連豬都自己養埋，既然係首富養嘅豬，梗係要試吓，華華食到一味青椒炒豬肉，簡單一道菜，真係食豬有豬味，怪唔得佢哋員工話，食「三一重豬」比每日運到香港嘅生豬更安全。
除咗自己養豬，三一又響東北包咗農地種米，淨係供應畀三一集團食用。集團仲會為員工提供每年一次嘅驗身服務，有健康嘅員工，先可幫自己搵錢，真係抵梁穩根做雙料首富！