歐洲危機又升溫，市傳希臘考慮破產，搞到歐美股市上星期五四腳朝天，其中道指大跌303點，完全當奧巴馬嘅刺激就業措施冇到，港股今日唔慌有運行。
跌市趁低吸納短炒一轉，幾時都係揀強勢股穩陣，如果息率夠吸引嘅話，就更加可取，名牌服飾股Joyce（647）就符合晒以上兩個條件，公司舊年（3月年結）全年賺1.3億銀，按年增長2.8倍，全年派息4仙，現價息率有4厘，作為零售股都算吸引。Joyce喺銅鑼灣利園嘅新店好快會開幕，肯定到時有一番作為，另公司手持5億銀現金，絕對有力喺中港市場大展拳腳。
Joyce現價市賬率（PB）同市盈率（PE），分別為2.56倍及12倍，比起同業I.T（999）大幅折讓四成，認真抵玩；6月底放榜後，股價由1元水平，炒到上最高1.27元，累積升幅達27%，其後輾轉回落，上周五收報0.99元，戰友可候低於0.94元吸納，短線博見1.05元，跌穿0.9元止蝕。
唐牛