若你問我相信中央電視台報道，香港單車隊總教練沈金康成為中國單車代表隊的教練是真的，還是相信香港單車代表隊其後否認該報道才是真的。我會答，很罕有地，我人生第一次相信內地官方傳媒的話。
為甚麼？因為那個是中國官方電視台，幾乎每一句要播出街的說話都經過求證核實；你以為睇緊嘅係亞視報道江澤民死訊？咁大一宗新聞不用經過證實就播出街，你以為自己係邊個機構？國務院定新華社，正常應該係國務院證實，新華社發放消息才是。而且牽涉到國家隊，都算係國家機密啩？點可以隨便冇buildup？
再者，睇番香港呢邊嘅反應，洪松蔭話係「幫吓手寫program」，幫吓手？乜沈金康好得閒咩？人人都話要備戰明年倫敦奧運，佢仲有時間「秘撈」，如果香港單車隊喺倫奧嘅表現強差人意，遭受批評，大罵他自己檔攤都搞唔掂，仲咁多管閒事，佢擔唔擔當得起呢？即使沈金康只係「幫吓手」，但佢貴為體院僱員，年薪逾120萬，出去秘撈有冇事先申請呢？
合約期滿才名正言順
大家都知道鋪排一個大型比賽如奧運，選手的訓練部署，體能催谷，所有訓練安排都以年計。其實沈金康幾時開始「幫吓手」嘅呢？若然中國單車隊明年喺倫奧又有一定表現，咁佢嘅program就值錢咯！邊隊國家隊冇興趣？我驚連岩士唐都話想要。
我一直欣賞及敬重沈金康，世上先有伯樂而然後有千里馬。沈金康是伯樂，黃金寶就是那隻千里馬；若是沒有沈金康，幾可肯定當年因紀律問題被逐出港隊的那個「loser」不會是今日的「winner」阿寶。
既然沈金康帶領香港單車隊的成績如此有目共睹，何以不名正言順待他跟港隊的合約結束，再提供一份國家隊合約給他，那才是我期待沈金康該得到的榮譽。
文：盧覓雪