「花弗」同有錢女「公主」拍拖，早排佢仲專登帶埋公主同三色台「高層」食飯，由於花弗一向做綠葉角色，有傳當晚公主乘機向高層開聲，叫佢畀多啲機會花弗發揮，以及畀機會佢上位擔正做男主角，但關仁聽聞其實剛剛相反。
原來花弗私底下叫高層唔好畀咁多嘢佢做，事關佢同公主拍拖，要花好多心思同不時有驚喜先至得女友開心，尤其係佢哋熱戀中，幾乎見少日都唔得，加上公主鍾意成日呢度去嗰度去，真係少啲精力都唔掂，所以花弗要求高層唔好畀咁多嘢佢做，怕自己工作太困身嘅話變咗冇時間陪公主，始終公主又有青春又有錢，唔睇緊啲，分分鐘俾人撬咗去都有之！