滙豐裁員三千，終令香港人見識到乜嘢叫獅子開大口。傳媒又再翻出香港人對滙豐感情，金融海嘯後如何供股助度難關，雖則老土過白燕張活游，一派香港人癡心錯付，濫情可笑，但滙豐管理層失當失態更得人驚。連政府高層也講：「有冇搞錯！」
話說裁員公佈後，滙豐翌日有活動，原定王冬勝同勞福局張建宗及環境局長邱騰華做慈善基金主禮，當日忽然通知官府王總有事，結果在傳媒雲集下，只由張建宗硬住頭皮回應裁員一事。做滙豐亞太區一哥做到咁，唉！滙豐當然唔認，話王先生有其他事早已預定唔出席。大家心照若當日活動只由二打六主禮，點會請得郁兩位局長做站台嘉賓。
今時今日靠一條LineToTake（一堆語言無味官腔文字，簡稱LTT）應對危機已經完全過時。政府近年苦苦掙扎、飽受傳媒記者煎熬，就係昔日靠不斷重複官方立場去應付傳媒質疑已失效，記者唔會採用，發言人講咗等如冇講。王冬勝發畀員工電郵真係渣到離譜，完全係官方LTT，些少人味也欠奉。過去本地英資一直是香港先進資本代表，「香港管理」所以有名堂，唔通係靠班本土地產財閥家長式管治咩？「香港管理」代表係政府、港鐵、馬會、國泰、九倉、和記、半官方貿易發展局、機場管理局等，本來還包括浦偉仕年代嘅滙豐及未改名前香港電訊。呢類機構是英資在港的代表，人事管理制度大同小異。
英式人事管理相對美式較保守，但也較具人味，並非一味用政策制度去管。骨幹的「政務官」階層唔會係賓州大學沃頓商學院高材生，而係念文學歷史經濟嘅通才，重視人際關係及公司文化延續性。美式管理源於福特汽車廠流水作業大規模生產，員工只係數字，而且近年發展出神級CEO文化，一人主宰公司發展，上場就要大發神威揚名立萬，討好基金經理投資者一齊吹大個波。王冬勝花旗出身，當年也靠裁員上位，心理上應毫無障礙，「如果裁員我唔做，也有其他人做，畀鬼佬做可能仲離譜。」這種自我辯解足令王總裁心安理得。
滙豐已是一間全球企業，走上這條路無可厚非，但高層處事也要有相應的風範，不能迴避公眾傳媒，以為用LTT就可過關，官場術語有云：硬着頭皮咬子彈BiteTheBullet。下月滙豐慈善活動，請了謝安琪任賢齊踩單車，王冬勝怕V煞踩場，請早安排其他活動，免得臨時縮沙俾傳媒嘲笑。
添馬男