馬季噚日終於開鑼，唐唐、振英哥、范太、葉劉四位疑似特首候選人，同時亮相沙田馬場。特首沙圈戰情緊湊，唐唐被評係「大智若愚」，佢畀選委陳永祺嘅買馬貼士竟然「開口中」；振英哥喺馬場拎住本書，似乎唔多「老利」。范太就未入閘先萌退意；葉劉則未知是陪跑還是黑馬。
葉劉陪跑分子
葉劉噚日現身馬場，十場賽事未跑完就閃人。佢睇見八方就放慢腳步，八方一心諗住佢會分析吓自己參加特首選舉嘅形勢啦，點知佢只係笑笑口咁話：特首選舉唔講喇。
唔知係咪計過條數，自己就算參賽，頂多只算得係匹黑馬，要爆冷嘅機會唔大，只能陪跑。所以暫時都係睇定啲先決定參唔參加呢場打吡大賽。
振英哥隱現「書」勢
振英哥最近嘅民望雖然同唐唐叮噹馬頭，更把握時機喺較早前表明去馬。不過，「備選中」嘅佢噚日就收晒口，記者追問振英哥點睇呀范太明撐唐唐。振英哥都只係報以招牌式嘅陰陰嘴笑容。聽聞振英哥噚日現身馬場，係應朋友邀請去捧場。
八方見佢有啲心神恍惚，顧住打電話，唔覺意走錯入職員通道，要由馬會職員請佢行番會員通道入場。振英哥仲拎住本厚厚嘅書《經濟大轉型》入馬場，似乎唔多「老利」。
唐英年「開口中」
唐英年噚日以署理行政長官身份入馬場，主持馬季開鑼前後，唔理記者問佢幾時決定去馬、幾時辭職正式參選。佢淨係依起棚牙，招牌式揮手就閃咗。不過撐唐唐嘅選委陳永祺話唐唐其實係「大智若愚」，智謀同計策都十分之好。陳永祺有料為證，爆響口話剛剛問過唐唐第三場買乜好，結果跟佢畀嘅貼士，買咗5號「時尚風采」搭3號「小橋流水」，結果真係跑出頭二馬連贏位。難怪陳永祺話自己真係好鍾意「唐唐」呢隻馬，暗寸其他馬唔好陪跑。
范太擺明「玩嘢」
范太係馬會女董事，當然好清楚馬圈內幕同文化。佢噚日講到明，如果唐唐去馬，佢一定落重「飛」買唐唐跑出。如果唐唐唔去馬，咁佢先至會考慮自己參賽。不過佢都心知肚明，參選特首就好似賽馬咁，唔係人人都玩得。
佢話自己個馬房，只得佢自己同一個助理，參選要使好多錢。之前話會考慮出選，擺明玩嘢！
mailto:[email protected]