記得去年中秋打風，差點連月都無得賞。今年，天氣好，一於將活動排得好好睇睇補番數。年頭被趕過的廣州塔戴摩天輪皇冠攞彩；東京SkyTree未開但有超高級壽司伴食賣奢華，仲有狂歡月夜派對同傳統歌舞熱鬧。點都好，都旨在搵個藉口與摯愛放假、望天、團圓啫。
記者：陳慧敏
1.廣州追月40分鐘
9月1日最新開幕的廣州摩天輪，450米現為全球最高，等你轉住嚟賞月。
最高纜車扮嫦娥奔月
「究竟有無玉兔同嫦娥啫？爬高啲睇清楚啦！」年頭被東京SkyTree趕過亞洲最高的廣州電視塔，剛剛9月1日，全球最高「摩天輪」又開幕攞番個彩。你夠高咁又點啫？我有皇冠仲識氹氹轉喎！16個球形車艙每個可載六人，置身450米高空，天氣好的時候不用行都可看遍小蠻腰同廣州市全景，走一轉約20分鐘。雖然個個有陰影，見到車軌就怕大吉利是獨困愁城高處不勝寒，但當局話摩天輪壽命最少30年，設計上連百年難得一遇的風災都頂得住，而廣州最多只有側風濕濕碎，且每個車廂都有避雷針同風災前20-50分鐘識響警報保證安全！最厲害係，中秋佳節摩天輪套票由日頭原價$130人民幣（包上塔門票費用為$280），增至夜晚賞月價$599人民幣，但就包括107、108層門票、餐飲同禮物，「繞圈」時間雙倍成40分鐘，兩個人千二蚊，快啲手迎月追月一次過做晒就抵啦。
地址：廣州市海珠區新港中藝苑路
電話：（86）020-83818557
網頁： http://www.cantontower.com/
2.「天空」餐廳食住賞
東京全新壽司餐廳SORA（天空），明月配SkyTree，嘆江戶前壽司。
$200/件壽司高空食
唓！你有氹氹轉皇冠又如何？位處30-38層大廈頂樓，東京最高的六星酒店文華東方，新開只得八個位的全新壽司餐廳SORA。落地玻璃讓你越過東京市望住有634公尺高的TokyoSkyTree。大廚YujiImaizumi追求「高級」但「Simple」的江戶前風味。Yuji：「食材不是新鮮就美味，喪加香料就有料。」例如靚三文魚要以恰好0℃保存4天，等肉質更鬆軟，油脂均勻相融；鮮鮑魚以清酒煮4小時，再存起三天，才是香味最索之時……」抄了小記幾版紙！高級但哪裏Simple了！
SORA
地址：東京都中央區日本橋室町2-1-1，東京文華東方酒店38樓
電話：（81）03-32708188
收費：午市套餐約$1,200起
晚市：$1,500起
3.滿月派對沙灘狂歡
天黑黑人狼變身！蘇梅島唔玩燈籠直情玩火的中秋派對。
火燄沙灘成人玩
若坐定定的摩天輪同高級餐廳令你如坐針氈，蘇梅島鄰近的帕安島（KohPhangan）根本係個Party島，滿月半月甚至無月都有藉口狂歡一餐。白天個水清沙幼的浮潛靚灘，月亮一出，餐桌同七色吧枱蒲頭，成千上萬遊客即變身為狼，清純沙灘變「人間天堂」。灘上除了BBQ香同幾個舞台DJ打碟，燈籠掛滿滿，啲人唔煲蠟但玩火呀！火燄滑梯同烈燄跳大繩，勁過獅子跳火圈！仲唔係成人玩意？
KohPhangan
交通：由蘇梅島乘快艇約半小時達
網頁： http://kohphangan.com/
4.全城公演過中秋
韓國中秋，全城連遊客區、民俗村同遊樂園都有公演。
扮韓尚宮免費玩穿越
韓國人的中秋勁忙。11-13日在韓國，德壽宮、南山谷韓屋村、國立民俗博物館都有民俗活動，着齊一身韓服，後兩者更讓你免費入場玩穿越，參加傳統公演、民俗遊藝體驗等活動，玩蹺蹺板、投壺、打陀螺等。民俗村更有四物農樂、走繩藝技、祭祀同馬術表演等。連愛寶樂園及樂天世界、首爾樂園都有傳統舞蹈公演，全國中秋氣氛勁濃！
查詢： http://big5chinese.visitkorea.or.kr
（韓國觀光局網站）
5.一次過賞33個月亮
杭州西湖的三潭印月，一次過睇33個月亮奇觀。
33個永恒之月
忽然OldSchool？不啦！今年在法國巴黎舉行的第35屆世界遺產大會，正式將「杭州西湖文化景觀」列入《世界遺產名錄》。嗱，呢啲咪叫永恒囉！特別係秋天時節更是旺季，先賞平湖秋月，再觀「三潭印月」，三座橋的15個橋孔，倒映出30個月亮，加上天空一個，湖上一個，還有「印在你心頭的一個」，成就「33個月亮」「三潭印月」名景，工作人員還會到湖中心點上蠟燭變成滿天繁星。其實，挺浪漫的。
