奧巴馬出重拳救經濟，但個市都冇咩反應，又再套用前輩名言：有好消息都唔升，就係沽空嘅時候。上周國壽（2628）「烏龍盤」事件，巨型買盤掛入，理應吸引聰明錢跟進，點知卻引來基金狂質，反映大戶掟貨走人嘅心態幾明顯！後市的確不容樂觀。
市況呆滯又缺水，惟有繼續短線出擊，密食當三番。業績好、估值平、走勢轉強股份秤先，重慶機電（2722）兼而有之，短線上望2蚊，博賺15%。
重機主營商用車零部件及電力設備業務，上半年賺3.9億人仔，按年增長12.4%，預測PE7倍唔夠，升到2蚊都係8倍PE，一點不過份。
公司7成以上產品用於汽車、重工業、能源同基建方面，瓣瓣業務都受惠國策扶持，增長潛力龐大。集團更藉併購谷增長，剛斥資7500萬人仔，全購風力發電機組葉片生產商大安晨飛，開拓風電業務。
走勢上，重機股價上月於1.52元見底後，以「圓底」形態回升，上周五大成交突破月初高位，走勢轉強，10日線快升穿20日線，MACD牛差距逐步擴大，均利好後市表現。股友可1.70元水平買入，睇2蚊，失守1.60元止蝕。
魏力