馬季開鑼 - 左丁山

馬季開鑼 - 左丁山

新馬季今日開鑼,左丁山本想養精蓄銳,到馬場贏番啲銀両,攞個意頭。點知披圖盛意拳拳,訂咗一個廂房請左丁山到場,本來想推嘅嘞,最後披圖話:「喂,特登搵開鑼日招待朋友,係我生日派對呀!」咁呀,冇得推咯,唯有應命,之後聽到傳聞,疑似候選人L會入場賀披圖生日。跟住議員L又話在VM廂房有張大枱,請咗成班老友,老總P叫左丁山一齊去,議員L係疑似候選人T嘅老友噃,哎,點搞好,自己張長枱唔通唔到吓咩,如此說來,今日在馬場應酬食嘢多過刨馬,恐怕輸多贏少咯。
幾個星期前,食家L埋怨左丁山唔寫多啲馬,唯有向佢解釋,一啲讀者對馬冇興趣㗎,寫得多會趕客。食家L話:「我鍾意睇噃,反而你寫食經我就唔睇!」這正是順得哥情失嫂意,報紙專欄分門別類,給讀者各取所需,一個欄好難會全部人都滿意嘅。
不過開鑼日噃,即使食家L唔講,自己手痕痕都要寫幾行。全日主題特首盃(第三場)只有八隻馬出賽,唔算熱鬧,八隻馬都係一千至千四米好手,其中左丁山比較睇好3號「小橋流水」,呢隻馬跑千二有佳績,由三月二十日之後休息至今,疲態盡消,應是首選;告東尼馬房出兩隻,2號「萬事佳」、6號「讚賞」都有力一爭,以2號較佳;韋達騎4號「富貴金龍」唔會陪跑,一定加入戰團,呢場買3、2、4。睇邊位馬主夠運自唐英年司長手上接過獎盃。
第四場之後轉播日本阪神馬場之「人馬錦標」,方嘉柏馬房有兩馬參戰,就係「天久」與「綠色駿威」,「天久」如有香港狀態當然有資格奪標,但馬到日本,必受包圍,狀態要好到百分之一百二十,加上運氣,方可突圍。叫肥仔K上日本馬網搵料,佢話工作繁忙,唔得閒,或者臨場先至用iPhone上網搵貼士喎。
講起馬房,全日似乎以蔡約翰最惡,全日出七隻馬,隻隻有三甲機會,睇落最穩陣係第九場1號「皇帝法令」,質高態勇,資深大狀馮柏棟及夫人、千金又有機會一齊拉頭馬。上季練馬師冠軍大摩只出三場,第七場14號「醒目精英」,明年有資格跑打吡,只要盡早爭取評分上升,搏殺必矣。