滙豐香港大班馬凱博（MarkMcCombe）突然辭職，消息震撼程度，較裁減3000個職位，有過之而無不及。面對削職潮風雨飄搖嘅日子，唔少人對「Mark哥」，由香江一哥，躍升做全球最大資產管理公司之一嘅貝萊德，出掌亞太區主席，不再立滙豐危牆之下，艷羨之餘，對其劈炮原因，坊間亦有唔少揣測。
據消息透露，原來靚仔Mark離職（唔係削職）癥結，乃集團計劃遲啲將佢老哥調派回倫敦，聽聞兩三個月前集團內部已開始討論。
Mark哥嘅職級性質，屬滙豐精英骨幹嘅國際行政人員（IM）類別，IM嘅特色係，整體薪酬配套異常優厚，但總部一聲令下，第二日就要即刻收拾細軟，出發去新市場報到，無論係燙手山芋抑或槍林彈雨，喺份人工入面都包晒風險。
調回倫敦須交重稅
不過，納慣香港15%低稅率嘅Mark哥，似乎晤想再返英國畀50%高稅率，而且世紀海嘯後，環球財富西向東移，香港背靠祖國，係亞太區心臟，有貝萊德咁優厚嘅offer（條件），銀行業前景又唔睇好，佢放棄同門口一對鎮山銅獅──Steven及Stitt繼續玩，亦好正常。
呢個星期正值八月十五中秋，貿發局喺倫敦舉行推介會，其中設有本港金融中心推廣環節，由金管局總裁陳德霖，同埋3間發鈔行大班出席，滙豐銀行本來由前香港區總裁馬凱博代表，中銀及渣打就有和廣北及洪丕正亮相，之不過Mark哥已經離隊，所以會由新任香港區一姐馮婉眉（Anita）頂上。
「馮姐」（行內稱呼）以往代表滙豐環球銀行及資本市場亞太區，出席唔少研討會及致辭，又經常喺集團投資推介會站台，氣定神閒，呢次以香港總裁參加TDC推介會，駕輕就熟啦。