今個月初脫罪嘅無綫電視業務總經理陳志雲（圖），雖然可能要面對上訴官司，但心情依然唔錯，仲有心情去睇樓。地產代理爆料，話陳總噚日晏晝同位男性朋友去咗尖沙嘴睇新世界發展（017）旗下豪宅盤名鑄，睇一個1500平方呎嘅示範單位，但就齋睇未買。
新世界一直逐少逐少推名鑄出嚟賣，十分惜售。聽講，陳總噚日睇嘅單位係向鯉魚門海景，高層接近3000萬元，低層都要2000萬元，可惜高層單位差唔多賣晒，唔知係咪因為選擇唔多，陳總先至未有即時扑槌。
市場盛傳，陳總家係行內搶手貨，傳聞壹傳媒（282）老闆肥佬黎以千萬年薪邀請佢加盟壹電視，now老闆李澤楷同騰訊老闆馬化騰都有向佢招手。照咁睇，陳總睇定樓，換吓環境都唔出奇吖。