當著名司儀名嘴遇上電台DJ，大家都是靠口才搵食，鬥嘴場面見怪不怪，殿堂名嘴鄭裕玲（嘟姐）即將拍DJ艾粒（Donald與少爺占）開咪，三人隨時開戰互寸反轉電台，且看開咪時會否如他們的節目名一樣，口水多過浪花。
撰文：卓寶花
鄭裕玲將於明日夥拍DJ艾粒在商台開咪，今次年輕一代遇上殿堂級名嘴，原來是艾粒主動找嘟姐合作，費了不少唇舌才獲答允，加上幕後是商台這個強大機構出動銀彈策略，終打動12年沒開咪的嘟姐，坊間更有傳這個強勢組合出擊是為了對撼即將重新開咪的大班。
口水多過浪花
艾粒不經不覺已合作十年，邀請嘟姐因由是希望打造新火花，Donald說：「十年要有啲新搞作，以前合作嘅人都係DJ，舊年同嘟姐喺無綫合作節目《逐格鬥》，大家friend咗，所以半年前有合作意念，就打畀嘟姐。」節目取名為《口水多過浪花》，原來是跟拍攝《逐格鬥》時息息相關，阿占說：「由來係做節目時個個想準時收工，但嘉賓喺現場又會好多嘢講，呢個時候嘟姐就會話『咪口水多過浪花』。幾好笑，好少人會咁講，通常會講『咪口水多過茶或浪』，諗諗吓原來有一句係『口水多過浪花』，後來問嘟姐，佢話鍾意畫畫，話浪花靚過浪，所以決定用呢個名。」
《口》的節目內容會以懷舊作主題，與聽眾分享值得緬懷的時間、地點或事物，事先要做足不少準備工夫，Donald表示：「為令嘟姐可以快啲投入節目，我哋會幫佢準備好所有資料，等佢專心隨意吹水。」
艾粒或變鵪鶉
Donald又鬼馬地形容今次跟嘟姐合作是金口遇上電台臭口，嘟姐工作態度嚴謹，艾粒冇有怕，Donald說：「做電視節目壓力大啲，我哋喺電台橫行霸道，到底到時嘟姐會變成新人俾我哋點同寸，定我哋喺電台會變成鵪鶉，相信聽眾會好有興趣。」
嘟姐口才了得眾所周知，無綫所有大騷幾乎都由嘟姐撐起，她靠把口搵食，但開咪卻少之又少，她曾於1999年孖章小惠在商台主持《單身女人營》，以探討女性為話題，和今次的懷舊話題全不同，但嘟姐仍輕鬆面對：「對上一次開咪已經相隔好耐，但唔會有壓力，有我就唔鬼做啦。」
嘟姐嫌艾粒老餅
嘟姐今次有興趣踩入電台是想闖出無綫看世界，嘟姐說：「想離開無綫睇吓出面嘅世界，但主要搵啱拍檔，同艾粒之前又合作過，佢哋幾有幽默感。當時佢哋都睇住我，有時節目會請新人，我都唔識，我會叫佢哋幫我介紹啲新人出場。」
酬勞麻麻
坊間有指重金禮聘，是今次成功利誘嘟姐的原因之一，對此嘟姐說：「講真麻麻哋㗎咋，唔係錢問題，首要係想唔想做，主要想交流吓，但原來相處落，佢哋兩個都唔係咁年輕，都有啲老餅。」
場地：KAPPUJAMMING
鄭裕玲
髮型：JeffCheng@MMAVEDA
化妝：PuiPui
服裝：
‧[email protected]/ALEXANDER
‧[email protected]
Donald
髮型：馬格爾。哈囉
化妝：Chris@女人