蘋果「敏妮Talk」（九月七日）提到左丁山講過之曼谷Zanotti啲酒好貴，臨尾講到：「DomPerignon2002喺香港WineCellar都係賣緊千鬆啲，Zanotti賣貴3倍，難怪朋友吔吔聲，不過又唔怪得左丁山，佢今次帶家人去度周末，未必會叫酒，唔知酒價貴都情有可原。」
不妨講多一句，左丁山在Zanotti有飲酒嘅，不過人地嘅WineList寫明價錢，明碼實價，自己荷包唔夠豪爽嘅話，點敢叫枝有名氣嘅DomPerignon2002吖，呢隻名牌香檳來自好年份，外國酒評家稱之為1996年以後最好嘅，JancisRobinson給予20分滿分，正嘢嚟㗎，在香港零售價一般為一千二百三十八元，屈臣氏近日做緊推廣（promotion），只售一千○八元，但在餐廳開一枝酒，價錢起碼比批發入貨價mark-up二至三倍，在泰國還有入口稅，而香港免稅，所以Zanotti收一萬六千五百銖一瓶（約四千四百六十港元），有數得計。左丁山吃餐時，飲乜酒呢，翻查單據，係一瓶白酒Sauvignon，唔記得甚麼年份咯，價錢係一千三百銖，味道唔曳㗎。
左丁山對餐酒知識並不豐富，要深入啲探討，就會問張總，要知道價錢，就問餐飲M。餐飲M在蘇豪區開零售店，專賣西班牙酒，RobertParker九十分嘅西班牙紅酒只賣三四百蚊一瓶，抵啦，呢日佢來電報喜，就係佢搵咗一瓶零售價一百五十元嘅西班牙紅酒Rioja2007MarquesdeCarrion去參加九月六日至八日舉行之「香港餐飲展」一個比試項目，名為TheBestHouseWine，有一百四十幾枝酒參選，居然名列八名「金獎」之一，令餐飲M非常雀躍，話西班牙紅酒又平又靚喎。
香港自從撤消葡萄酒稅（唐英年曾俊華兩位司長之最大德政）之後，迅速成為亞洲紅酒中心，用林奮強近日常用術語，就係紅酒生意與紅酒入口、批發、零售、拍賣、儲藏整個新興行業之上升，有如J曲綫。呢個紅酒行業之大躍進證明咗一個經濟學概念：減稅可以刺激新生經濟行為，呢個行業勝在年青，老人家唔多，好適合年青人入行。現在每年於香港拍賣嘅紅酒收益，比倫敦紐約有過之而無不及，五年內應該世界第一，配合得到金融中心之國際化，環球化。