中國二千年前，孟子阿媽為咗個仔成材3次搬屋，如今足球壇亦有個望子成龍嘅媽媽，呢個就係英超曼聯前鋒朗尼個老婆高蓮，繼佢之前畀囝囝佳仔（KaiRooney）學游水，學識點樣喺水中「掙扎求存」後，現時只得22個月大嘅佳仔又有新嘢學，就係學騎馬！
高蓮真係一個潮媽，亦絕對係一個好媽媽，佢識得點計劃幫個仔成材，之前帶阿仔去咗學游水，每堂要成600鎊（約7,500港元），主要訓練吓膽量同埋肌肉，學有所成就喺上個月帶咗佳仔去杜拜玩海豚，場面真係溫馨！高蓮見阿仔學得咁快，認為佢好似爸爸朗尼咁醒，都係神童一名（朗尼16歲時效力愛華頓射爆阿仙奴後被封為神童），就畀個難啲嘅任務佳仔學。
第一堂就似冠軍騎師
高蓮近日喺twitter就擺咗佳仔張騎馬相，只見佳仔眼仔碌碌、英明神武，雙眼望前方，陽光仲照射喺佢面上，真係好似冠軍騎師咁款，難怪高蓮好興奮咁以「LittleJockey」形容佢：「你睇吓佳仔坐得幾咁淡定，真係唔講唔知，原來呢堂只係佢第一堂咋！」
查實高蓮絕對係英國球壇最忙碌嘅媽媽，老公朗尼成日出賽，25歲嘅高蓮都會着到成隻雀咁力撐，真係好花時間！家又要咁花時間咁帶阿仔周圍去學嘢，虎媽咁有恒心，朗尼都唔忍心再去滾啦！你話係咪？
高蓮勞心勞力湊佳仔，曼聯領隊費格遜都好努力繼續帶隊，仲好照顧一班新兵，好似新加盟嘅西班牙門將迪基亞嘅適應問題咁，費Sir就已經講過好多次「撐佢」，佢日前又再開金口：「迪基亞之前有出錯，但我深信佢一定能夠成為世界級門將，當然佢自己亦要繼續下苦功啦！」至於爭標嘅問題，費Sir亦都向球迷畀行貨「貼士」，話英超錦標離唔開6隊爭，就連開局麻麻嘅倫敦雙雄阿仙奴、熱刺都有份，大熱當然係曼聯啦！