在商業世界，品牌與品牌Crossover推出的產品，通常都係必勝之道，皆因這些特別版產物不但罕有，設計往往帶來新意念新味道。風行年輕人界的小車子Fiat500，早前跟時裝品牌Gucci互乘推出Fiat500Gucci版，實行一箭雙鵰俘虜兩邊Fans！
記者：蕭漢祥
攝影：譚盈傑、黃俊熙
Model：Olga@StarzPeople
公主出巡設核心保安區
這部名為Fiat500Convertible1.4Gucci，早於幾個月前曝光，到最近終於空運到港可以一睹風采。代理話現時全港只此一部，非常珍貴，所以相約採訪都有別於一般安排，簡單說就係有如「五花大轎、公主出巡」，為保護呢部Fiat500，賣出前絕不會落地駕駛，出入都由拖車上架運送。拍攝時無論攝影師或模特兒，都要非常小心跟它接觸，如有損它千金之軀真係萬死莫辯。點解咁緊張？皆因除引擎及外殼之外，其餘車內車外的部件均由Gucci製造，如有任何損壞，均以「一換一」方式，將該部件寄回意大利Gucci更換，為免賣出前有乜損傷，拍攝時真係要設立核心保安區。
搶眼彩帶引誘Fans
特別版共有黑色及白色兩個版本，今次運抵香港的是黑色。先談外表，車身兩側塗上代表Gucci的紅綠彩帶，雖不是大面積非常顯眼一類，但配合車窗旁鑲有Gucci的字樣，感覺簡約、恰到好處，品牌Fans必然留意到。為配合設計，Fiat方面亦為特別版的深色車身噴上金底油，令部車在燈光下顯出金光閃閃效果。
踏入車廂，無論是兩邊車門的腳踏、地毯、以至全車皮椅，均刻上或印上Gucci的花紋，再加上皮椅及中控台的黑白對比，整個內櫳設計都非常醒神。雖然軚盤設計跟普通版差不多，不過在上半部份的白色真皮，亦都是由Gucci包辦。
限時生產一年
對於年輕人來說，Fiat500外形Cutie食正小車子趨勢，且在現時高油價的環境下，使用1.4公升引擎既慳油又慳牌費。呢部車隨時有升值潛力，皆因代理表示雖然這車並非限量版，但由於現階段廠方只會跟Gucci簽約一年，一年內可以生產多少就視乎全球定單，再者香港亦只會限額入口，正所謂物以罕為貴，咁貴幾多？特別版與普通版比較，兩者的車價相差約七萬港元，而未來更會推出一部開篷Gucci版的Fiat500，車價接近31萬元，女士們會否考慮買嚟襯衫呢！
想近距離欣賞呢部Fiat5001.4Gucci，可以於今個周末起到Elements圓方參觀Fiat車展，屆時另一部Fiat5001.2BacktoSchool別注版都會同場展出，萬勿錯過！
展出日期：9月10-24日
Fiat5001.4Gucci
引擎：1,368cc直四
馬力：100bhp/6,000rpm
扭力：131Nm/4,250rpm
傳動：5前速+/-波箱
售價：$279,888
查詢：29219999（太古汽車）
