早年跟某位名人到成都採訪賽車，其中一場內地富豪賽事，雲集歐美各大知名跑車，真係講得出的大牌子都有，簡直就係賽車界散打賽。到最後，奪冠的竟然係全場唯一一部日本車日產GTR-R35，當日的R35已經咁勁，2011GTR更加係強得超乎想像。
記者：蕭漢祥
攝影：譚盈傑
Model：Kathy@StarzPeople
馬力大增45匹
最近接獲代理電話，表示可以測試2011年版本的日產GTR-R35，對於一向有留意車壇消息的讀者來說，都知早於年頭已有不少水貨車到港，亦先後報道過；不過由代理正式借出行貨測試都係首次，咁突然原來有驚喜！
早前已聽聞過GTR行貨的引擎設計跟水貨有別，之前遇到的R35最大馬力及扭力是485匹及60kg-m，今次行貨同樣是3.8公升雙渦輪增壓引擎，經廠方調校後，馬力輸出達530匹，由3,200至6,000轉最大扭力為62.5kg-m。
數據還數據，親身體驗最緊要，測試安排在人少車少的將軍澳工業邨進行。儘管數字十分強，但起步時輕踏油門，R35同樣可溫柔地加速，表現平易近人，完全沒有一點難駕馭的感覺。踩深一點，強勁的推背感覺自三千多轉出現，同時透過中控台的屏幕亦睇到G-force數據，廠方公佈0-100km/h只需3秒，重新調校後極速由原本310km/h上調至315km/h。
廠方為提高行車的舒適度，波箱由以前的R/Normal/Snow三種模式，改為R/Normal/SAVE模式，令駕駛長途車時更舒適，可以更慳油。若想開得狂野點，轉去Rmode反應更快更靈敏，配合全新VDC-R系統，有如棍波車般將轉數控制於4,000轉作炮彈式起步。制動作調校提升表現，使用390mmBrembo前六後四活塞卡鉗，比以往增大10mm，碟面增大提升磨擦力，令我更安心地開盡一點，感覺……爽！
配LED燈更具殺氣
外觀大致上跟上年版本差不多，車頭及車尾新增了LED日間行車燈及後霧燈，整體觀感比以往更充實，在夜間直情有殺氣溢出。進入內櫳，由於今次拍攝的是GTRPremium版本，裝上真皮配仿皮防滑物料的桶椅，若是R35BlackEdition便會安裝Recaro桶椅。中控台佈局大致無變，但多個地方改用碳纖物料，令車重下降，淨重介乎1,730至1,750kg。這部4座位戰神，即使坐滿人也未算擠迫，但我覺得一位美女在旁已足夠。
NissanGT-R（R35）Premium
引擎：3,799ccV6CVTCTwinTurbo
馬力：530ps/6,400rpm
扭力：62.5kg-m/3,200-6,000rpm
傳動：6前速雙離合器自動加減波箱
售價：$1,778,800
查詢：28035333（合誠汽車）