馬照跑、舞照跳講咗十幾廿年，特區跑馬事業，換旗後繼續興旺，不過兩個馬場卻似乎唔係幾與時並進，趁新馬季聽日開鑼，馬會CEO應家柏噚日公佈耗費70億元嘅「新世代馬場」大計，未來幾年逐步改造提升沙田及跑馬地兩個馬場設施。應家柏話目標係將香港賽馬打造成世界級產品和國際性品牌。
入場唔只跑馬咁單調
落實「新世代馬場」計劃後，馬迷日後唔止「鋪草皮」，仲有份將馬場變臉，整個「新世代」工程分三期進行，首期美化設施已竣工，趕及明日新馬季開鑼畀馬迷享用。首期工程費用約7億元，包括全面翻新馬主廂房，仲新設畀「大客」享用嘅風雲軒，同埋供年輕會員嘅新廂房。八方噚日現場所見，新廂房窗明几淨，感覺闊落開揚過以前，至於對賭運有冇幫助，開鑼後先知。
第二期工程隨即展開，預計2014年完成，至於第三期仍在規劃中，要到2015年後才施工，呢兩期工程，各投資31億港元。馬會會員即時可以享用嘅，包括專為年輕會員而設嘅廂房，馬會幾年前成立競駿會，吸納年輕一族賭馬，似乎日漸見到成效，新廂房裝修風格young，據講每月有唔同主題活動，如香檳之夜，入場唔只跑馬咁單調。
至於一般馬迷，稍後可享用新嘅啤酒園，明年底仲會加設巨型電視屏幕，日後又有普通話貴賓廂房。應家柏話計劃將沙田同快活谷兩個馬場重新定位，沙田馬場非賽馬日會更容易畀市民使用，計劃開放彭福公園辦更多活動，最大突破係重建沙田馬場新入口，預計2014年落成。
港人進貢260億給澳門
馬會三大收入來源賽馬、賭波同六合彩去年度總投注額1,285億元，賽馬佔63%，馬會花龐大資金改建馬場，原因係面對嘅挑戰同競爭顯著增加，尤其係澳門賭場。馬會估計香港人去年「進貢」澳門賭場260億港元，是五年前三倍，較馬會上年度收入總額237億港元仲要多，所以一定要諗諗計。打造新世代馬場係咪留到客呢？事實擺在眼前，馬會點豪，都冇可能豪到好似金沙、威尼斯人咁興建個金碧輝煌賭場出嚟，既然係咁，輸少當贏囉。
mailto:[email protected]