馬會大興土木改建兩個馬場設施，行政總裁應家柏是核心推手之一。呢位德國佬07年初從黃至剛手上接過職位後，大刀闊斧改革，令97年金融風暴後積弱多年嘅投注額走出谷底，由06至07馬季640億元低位，回升至上季804億元。
盤數靚兼搞作多多
馬圈中人指應家柏唔只搞靚盤數，近年馬場設施越來越舒適，成立競駿會吸納年輕才俊做馬主，推動香港馬出外遠征，提升賽事水準，開設受歡迎嘅騎師王彩池，興建天水圍投注中心，創造偏遠地區就業機會，協辦08年北京奧運馬術項目等，都功不可沒。
應家柏明年2月約滿，八方聽聞佢續約機會極高，一來馬會董事局非常滿意其表現，二來馬會有唔少中長線發展計劃，好似從化訓練中心、爭取減博彩稅同新世代馬場改造工程，都跨越其任期，貿然換馬，要搞掂咁多嘢，唔容易呢！