鄭中基和余思敏奉子成婚誕下囡囡，日前男方大方承認兩人已註冊結婚。有線出身的余思敏自生女結婚後昨日首次曝光，卻倒戈亮相now。她謂現在與老爺奶奶同住，大家相處融洽。
有線前主播余思敏（Sammie）和鄭中基（Ronald）去年撻着，今年她為Ronald未婚誕下囡囡，日前Ronald承認7月時已在家中跟Sammie註冊成婚。昨日Sammie繼誕女和結婚後首次亮相，在土瓜灣接受同是有線前主播的鄭文主持的now節目《102觀星總部》錄影訪問。
改名中基話事
Sammie看來跟以前沒大分別，但她表示仍未完全收身，要努力減肥。為何首次現身不接受有線訪問，反而倒戈亮相now？Sammie表示今次純為支持老友鄭文，她強調曾跟Ronald一同接受有線電話訪問。幾時正式擺酒？Sammie的答覆跟足日前Ronald的答案，她說：「我想個女可以參與，等佢識行先。」果然是廿四孝老婆。她又透露B女的中文和英文名皆由Ronald決定，但未有透露名字，在旁的鄭文也忍不住笑說：「佢家簽咗畀Ronald。」
Ronald和蔡卓妍離婚，有傳他留下陰影，故要跟Sammie簽婚前協議，又有指Ronald在鰂魚涌買樓給她住，Sammie對此謂：「唔知點解有咁傳聞，我唔知間屋係邊個，我都好想識鰂魚涌啲街坊，不過我冇喺嗰度出現過。」
餵人奶親湊女
Sammie點頭示意現時住在Ronald的淺水灣大宅，跟老爺奶奶同住。至於Ronald有否離婚陰影？Sammie大晒幸福說：「我唔覺，總之我好開心。」Ronald有否送結婚禮物？Sammie又冧爆說：「個女已經係最大嘅禮物，係佢送畀我。」她透露現在仍餵人奶，希望親力親為湊囡囡，若有合適工作也會接洽，Ronald會尊重她的決定。提到和老爺奶奶相處，Sammie表示很融洽。
Ronald坦言明年有意再追多個，Sammie甜絲絲說：「佢話佢鍾意女喎，所以我都冇乜壓力，但我諗兩個OK，足球隊就冇本事，我又冇徐子淇咁後生。」
採訪、攝影：楊潔雯