張栢芝早前被轟沒為電影《無價之寶》做宣傳，前晚她以新髮型現身香港首映禮，卻只撐場10分鐘，在台上更大潑冷水，勁彈《無》片編劇兼導演王晶的劇本唔掂，令愛兒Lucas都頂唔順要爆肚改劇本。
張栢芝和謝霆鋒鐵定離婚後，栢芝近日頻頻返內地工作搵真銀，雖然她的工作態度一直備受批評，之前經常請假回港湊仔，又疑似扮病失場，當中被炮轟得最多是她不肯宣傳，早前《無價之寶》投資方便指摘栢芝不履行合約，沒有配合電影宣傳。
「啲劇本唔得」
前晚栢芝在香港首度宣傳《無》片，以粟米頭新髮型到圓方出席首映禮，穿上碎花連身褲及鬆糕鞋的栢芝，到場前已聲明不做記者訪問，雖然現場她與男主角鄭中基有講有笑，但她最終僅逗留10分鐘就閃人，連電影都沒欣賞，認真唔畀面。
栢芝在台上被問到愛兒Lucas在片中表現如何時，她說：「佢做番自己，我平時喺屋企都係幫佢冲凉同瞓覺，佢都唔知拍緊戲，佢有演技呀，可能有我少少DNA啦，仲有改對白，臨時爆肚，可能佢覺得啲編劇唔掂，一張紙對白都冇句跟。」Lucas有否扭計要再拍電影？栢芝繼續潑冷水說：「冇喎，應該係啲劇本唔得。」身為編劇兼導演的王晶在旁只得無奈打圓場說：「等佢18歲先畀部媾女片佢拍。」
事後王晶接受訪問大方撐栢芝並非不做宣傳，並說：「佢今次唔係唯一一次出席，之前廣西出過一次，開鏡又做過一次，不過作為製作商當然越多越好，但唔會強求我啲朋友做啲唔想做嘅事。」對於栢芝有否向他談及心情，王晶自言是長輩級，不會問她私人事。有指栢芝工作態度有問題，王晶就指要問她的新經理人，未來有適合角色會再合作，但Lucas就不會，因為他太細了。
Lucas返學開心
此外，RickChin前晚到金鐘出席活動時繼續栢芝代言人上身，並澄清Lucas有返學，他說：「影唔到就當冇，星期六佢唔使返學，就帶咗佢去玩具反斗城玩，畀佢揀生日禮物，細仔就冇帶。」他指Lucas剛上學，所以要他，又讚Lucas乖巧：「佢學嘢好快，已經識講毛巾仔嘅英文，同埋中文叻咗好多，佢第一日返學冇喊，仲識咗好多朋友，仲開心好多，細路仔需要群體生活，栢芝同霆鋒都係咁諗。栢芝就冇送返學，驚其他家長唔滿意。」
採訪：譚倩宜、楊潔雯
攝影：陳志嵐