鄭中基（Ronald）女友余思敏今年7月誕下6磅重千金，前晚Ronald在圓方出席主演電影《無價之寶》首映直認已於7月22日再婚，更風騷晒婚戒，坦言結婚過程從簡，但老婆感動流淚，他揚言明年會追多個。
由鄭中基、張栢芝、莊思敏主演、王晶執導的新片《無價之寶》，前晚在圓方舉行首映禮，現場安排切大月餅儀式。
B女重磅要減肥
自言似占士甸的Ronald表示3月拍完電影已半年沒有見過栢芝，由於早年兩人曾傳緋聞，問到與栢芝見面是否會尷尬時，已為人父的Ronald大反應說：「黐線。」之後又與王晶密密斟，並坦言會再傾合作事宜。
Ronald直認現時要努力搵奶粉錢，並自爆愛女要減肥，原來現時兩個幾月的B女體重達11磅多，他說：「平時呢個磅數係三個月大先追到，有問醫生使唔使減肥，醫生話唔驚，因為B女出世得6磅，所以家要追番，而且BB識調節番。」
提起愛女時，Ronald即滔滔不絕，並指愛女瞓醒似媽咪，合埋眼就似他，又自爆現時湊女湊得好過癮及好玩，又說：「好想追多一個，不過因為開刀，所以一年後先得，一年後就即刻開佢拖，家冇見個女一陣都心掛掛，做完嘢即刻返屋企，總之仔女冇所謂，我都鍾意。」
記者提Ronald仍欠女友余思敏一個名份，他即風騷展示手上婚戒，並承認已經再婚：「好耐啦，7月22日正式註冊，請咗個律師喺屋企搞，佢有着婚紗，我着西裝，都有感動場面，自己亦都有跪低，老婆仲有喊。」由於當年他與前妻蔡卓妍被爆瞞婚後，兩人即開記招表示辦離婚，對於今次再婚會給老婆甚麼承諾時，Ronald笑笑口說：「唔講呢啲啦。」
阿Sa唔執輸想生
此外，Twins的蔡卓妍（阿Sa）和鍾欣桐昨日到銅鑼灣出席時裝活動，對於Ronald再婚，阿Sa說：「恭喜晒佢，祝佢幸福，身份唔同咗，係一個爸爸，相信佢好勝任，追多個好，我都希望唔只生一個，不過隨緣，呢啲天注定，唔係想追就追，自己都未適合住。」
採訪：譚倩宜、卓寶花
攝影：陳志嵐
