八月三十日本欄提及在Cipriani吃晚餐，有一枱人大聲講，大聲笑，嘈吵不堪，與餐廳的氣氛不符，講及「呢班八十後」，一位出生於198×之讀者Ｃ來電郵抗議，指左丁山標籤八十後，甚不公道。
唔，在餐廳大聲喧嘩者，當然不限於「八十後」，左丁山一次出席中貿林之飯局，新城市美心皇宮內一圍枱，全部貌似五六十歲以上，更加嘈到坼天，左丁山連中貿林講乜都幾乎聽唔到。有一次在上海總會晚膳，隔籬枱坐咗十二位中年女士，聽佢地講說話，似足中學同學重聚，放到不得了，笑聲震天，搞到左丁山快快埋單鬆人，離開之時，其中一位女士企起身講電話，先至發覺佢係疑似一位經常在名人娛樂版曝光嘅女士。不少香港人就係鍾意大聲講嘢，讀者Ｃ唔鍾意左丁山講「一班八十後好嘈」，請明白左丁山無意針對任何特定年齡組別。
近來新聞報道上街示威，戴Ｖ煞面具撞門者，似乎都係八十後，有一日到某大私人銀行聽林奮強演講，一位年紀較大、老闆模樣之銀行客戶講：「一啲中產八十後嬌生慣養，富二代八十後更只識去蘭桂坊，我公司一個都唔請！」此又是另一個常常聽到嘅「印象」，可能人人都以偏概全，講得多就似係香港的八十後一無是處。實況當然並非如此，林奮強話80後世代有沉默的大多數，皆努力讀書，努力工作，大有前途嘅，香港未來有黃金五十年，就靠晒佢地去接棒發力上。一啲學者認為今天之80後展望將來，機會不如上一輩，難以買樓，故多焦慮。林奮強完全不同意，佢認為當今80後之機會，仲好過佢嗰一代（按林奮強今年五十歲），前途無限，有實力兼肯做事之青年，將來會叻過佢！
口講無憑，有辦可以睇，林奮強請咗八個畢業一年或剛畢業之80後、90後大學生同佢一齊做研究報告，位位幹勁十足，佢地來自本港地區名校/官立中學者多，只有一位出自國際學校，個個都係靠勤奮讀書上位嘅，同佢地傾偈，竟然諗起自己做銀行trainee搏殺嘅日子，香港下一代係有資格接班嘅。