呢方面有人痛批曾偉雄濫用警權，保護李克強過度，封鎖港大校園，應該下台；另方面社民連人員衝擊科學館內之遞補機制諮詢會，示威人士撞門、叉頸、涉嫌非禮、搗亂會場，搞到林瑞麟逃避入去另一房間。睇電視畫面，成家人都話，警察去咗邊？唔見有警察阻止示威者或在場分隔示威、反示威人士嘅？萬一兩派打起嚟，互擲花盆傷人，點算？
警察收到柯打就會嚴密戒備，冇柯打就由得一啲人士亂搞，大喊大叫製造噪音，究竟警察是濫用權力還是畏懼用權？以左丁山觀察，警察除咗保護兩地政要之時，敢放膽用權，甚至過度之外，在其他場地、情況，根本就是畏首畏尾，手軟腳軟，故此本地各類各樣示威人士一於冇有怕。
保護政要，美國緊張程度數一數二。克林頓做總統之時，訪問香港，美國特工話晒事，香港特警唔准埋身，於是弄出趣劇鬧劇，克林頓與佢嘅大隻佬保鑣數人一定要一齊入晒一部，入晒去之後，會展中心部不勝超重負荷，停，搞出一場虛驚，香港警察為之抹汗！今日有人鬧香港警察，保護李克強是否內地國安話事？唔好咁天真啦，當年克林頓啲特工（SecretService）幾時俾香港警察話事？
奧巴馬總統於美國時間九月八日下午七時（香港時間九月九日上午七時）到國會發表演講，與創造就業有關，全球矚目，不可不聽，香港股票界人士要聽完先至開得工。本來係今朝香港時間八點半九點左右演講嘅，但眾議院議長博納（共和黨）反對，其中自然涉及黨爭，但博納提出一個理由要延遲，竟然就係總統到訪國會，事先需要三個小時以上徹底清查（sweepthechamber）議會內外，確保安全後，總統先會駕到！由於準備需時，當日眾議院有秋季復會會議，眾議院話唔夠時間預備喎！嗱，奧巴馬去國會，離開白宮有幾遠呀？國會平時保安甚嚴，大把實Ｑ與國會警察，特工仲要「掃場」三個幾小時，如果奧巴馬來港，到是但一間大學行一行，見吓學生講人權嘅話，你估美國特工在港要掃場幾多小時？保佢大，叫佢去港大好嘞！