賭王三房長女何超雲和陳山聰戀情穩定，隨時變何家女婿。三太陳婉珍昨日就品評陳山聰，指相處過感覺OK，又讚他身形夠高，更不介意他有冇錢。三太又透露陳山聰送了冰皮月餅，她已邀陳山聰中秋和賭王一齊賞月，更坦言如果女兒未婚大肚，自己會幫手湊孫。
賭王三房長女何超雲和陳山聰高調拍拖、公開戀情，三太陳婉珍昨日以東華副主席身份，到油麻地出席廣華醫院慈善步行活動。問她可覺得女兒只顧拍拖，三太就護女說：「個個女仔識咗男朋友都係特別掛住拍拖。」問她對陳山聰感覺如何？她就表示不俗，更從外表、內在一一品評。
「暫時覺得幾好」
三太說：「都OK，我接觸過冇乜問題，但了解一個人要以『年』計算，唔係以『日』計，暫時覺得幾好，佢身形好高。至於性格要接觸過先知，佢送咗冰皮月餅畀我哋，到時中秋都預咗佢。」外傳陳山聰現居陽明山莊單位，其實是三太旗下物業，她就否認，並指不在意超雲男友的經濟能力：「睇佢哋有冇信心，一個人最緊要有上進心，我唔介意佢有錢定冇錢。」可覺得陳山聰有上進心，她謂：「佢都未拍劇。」
至於賭王何鴻燊看法，三太指賭王一向催促所有女兒結婚，至於可介意陳山聰曾經離婚，三太說：「婚姻生活好唔好，離婚未必係一個人嘅錯，唔開心夾硬一齊都冇用。」希望陳山聰成為女婿嗎？她說：「未諗咁遠。」
「只係叫佢小心」
超雲與陳山聰歐遊多月，有指兩人其實住酒店都同住一間房，三太有否叮囑女兒安全為上，她就表示要開懷接受子女，她說：「如果一開始就拒絕，後生仔以後唔會再講嘢你聽。我冇同佢講啲乜，只係叫佢小心。」假若女兒未婚懷孕怎辦？三太想了一會說：「如果真係咁唔懂得保護自己，有咗BB，我都會幫手湊。」
此外，昨日有報道指三太旗下公司所用的直升機型號，外地有公司使用時發生意外，她對此則不作回應。
採訪：王連連 攝影：黃文偉
