畫面幾靚都好，打FPS最好玩都係襯番支體感槍！今勻《Resistance3》配搭Move，令戰爭臨場感爆晒燈，特製槍架一Chok上彈，再冷冷拋下一句：I'llbeback！吳孟達都唔夠你型！
記者：許福合
攝影：林栢鈞
Model：AiyanaLo@PureModels
Chimera外星異族
《Resistance》系列出到第三集，古仔設定在第二集結局的四年後，殘暴外星Chimera種族已經完全佔領美國，玩家進入遊戲後，就要扮演倖存者之一嘅JosephCapelli，參與對抗Chimera的秘密軍事任務。場景特色之一，會在美國不同城市展開，但這些城巿在戰後都慘成廢墟，即使大城市如紐約市，亦難以辨認。同上集比較，Chimera會變得醒目好多，部份體形巨大，憑着長腿伸延，甚至可以穿過數個區堿，在一些你以為無路可進的地方向你發動襲擊，基本上係無絕對安全地方，所以即使上個廁所，都要記得先暫停再走呀。
Move變機槍
這集支援Move體感操作，若想玩得更投入，就可出動Move專用SharpShooter狙擊槍，放入Move動態及導航手掣就玩得。SharpShooter唔算重，手感不俗，唯一欠缺係無震動，開槍似放空槍，感覺怪怪的。透過準星瞄準敵人，會轉為紅色表示，相對較易爆頭一擊，不用每次都轉狙擊模式慢慢瞄準。若將準星拉到畫面四邊，鏡頭會跟隨移動，而角色移動就要用導航手掣，整體玩落其實不錯的，尤其係無彈時，Chok一下便Reload，可以爭取不少時間。
武器數量眾多，較經典有Bullseye、透視槍Auger等，並可隨遊戲進行而提升火力。當然唔少得大熱網上對戰，最多16人圍揪Chimera，或進行8Vs8對抗賽，如為盟友擲炸彈、建立防護罩等，不過連線玩時顧及的戰術較多，容易打到手忙腳亂，新手入Game都是在故事模式練習一下先！
腦龍亂入：狂死都係好事
早於遊戲派街前，腦龍已收到SCEH靚女PR隻Game。煲咗幾晚，又真係玩到唔停得手；遊戲風格回歸第一集，難度唔算低，不過唔好咁快放棄住，腦龍有個小秘技畀大家；每次GameOver，除彈藥會回復，槍枝熟練度都會累積落嚟，遇着想Unlock武器第二或第三級功能，就搵一大堆敵人嘅場景，殺剩一隻後再自殺，不斷循環下，支槍自然會越嚟越勁，過關EasyJob！
《Resistance3》
主機：PS3
類型：射擊
人數：1-2人（連線16人）
開發：SCE
售價：$388