紐卡素嘅足球，好唔好睇見仁見智，但間球會都算有生意頭腦，近期推出女性睡衣、內衣系列。啲衣衫設計相當性感養眼，話冇催情作用就勢係假，其中富有法式女傭裝束色彩嘅喱士緊身吊帶衫，擺明玩制服誘惑，最正係價錢唔貴，有興趣可以上網入貨。
法傭喱士吊帶夠誘惑
成個系列都以紐卡素球會黑或者白為主色，產品種類好多，有胸圍、性感吊帶褲、喱士緊身吊帶衫等等，全部都印上紐卡素logo，其中喱士緊身吊帶衫好有法國女傭裝束feel，令人想入非非。有評論甚至指出，今季紐卡素引入卡比耶、馬維奧斯、奧巴坦，加埋賓艾化，法國味好重，連出性感睡衣、內衣都走法國路線。各種產品種類多元化，最貴嘅吊帶套裝都係27鎊（約336港元），較平嘅襪帶就87蚊港紙有交易。（ https://shop.nufc.co.uk）
暫時未知紐卡素除咗擺上網，仲會點sell呢啲催情產品，若然由我求大俠揸旗，就幾歹每場主場比賽都搵班樣靚身材正嘅模特兒，着晒呢啲性感內衣、睡衣撐場，到時聖占士公園即刻產生高溫效應，球迷睇到㷫烚烚，氣氛都正啲，達到促銷效果就更加不在話下啦。
狼隊曾出過類似系列
查實球會出內衣褲呢一招，紐卡素並唔係先驅，狼隊一年前已經出產過類似系列，當時商人大條道理話「呢個世界大概有兩成球迷係女性，但得3至5%足球產品為佢哋而設」，不過講到球迷群勢力同市場潛力，狼隊當然同東北大會紐記冇得揮；而最失策係狼隊當時搵個水桶腰嘅模特兒宣傳，今次紐記onlineshop嗰個女模，身材同樣貌都正得多囉。