德國女足原本威到盡，點知一鋪清袋，今個暑假打完嘅女子世盃決賽周，有主場之利都要8強出局，未能3連霸之餘，仲連出年倫敦奧運嘅入場券都攞唔到。德國女足頹成咁，梗係要搵啲嘢振奮吓啦！結果搞咗啲乜？咪係搵班女子球員影輯性感月曆囉，不過大家放心，班模特兒唔係佩蓮絲佢哋，而係一班樣靚身材正嘅囡囡呀！
白背心黑色熱褲上陣
查實喺今年女子世界盃開波之前，德國版《花花公子》為咗幫德國女足造勢，搵咗5個德國女子U20代表隊成員，拍咗輯透點嘅性感相，仲大獲好評。所謂「橋唔怕舊，至緊要受」，有月曆製造商就食住條水，搵咗12個球員拍攝2012年嘅掛牆月曆。同之前唔同，拍攝呢個月曆嘅模特兒，係喺300個候選人（全部都係女子足球員）中千挑細選出嚟，負責揀蟀更加係模特兒公司嘅評判PeymanAmin，所以喺質素方面絕對有保證，而且仲索過之前幫《花花公子》拍嗰5個。更重要嘅係，呢次走唯美路線，冇露點冇露籮，模特兒透過身上嘅白色小背心同埋黑色熱褲，去展示女子足球員嘅性感一面。
名師操刀盡顯美感
成個月曆有12張相，全部都係喺德乙FSV法蘭克福嘅主場實景拍攝。12個模特兒着起代表德國國家隊嘅白衫黑褲，做出唔同嘅動作，當中有動態，亦有靜態；而我求大俠睇過啲相，得一個字形容，就係「掂」。操刀影呢輯月曆嘅攝影師賀尼斯就話：「我哋影呢輯月曆嘅目的，係想令女子足球變得有吸引力，並令外界可用另一個角度嚟睇女足。唔少人對女足有偏見，認為踢波嘅女人都係好男性化同周身肌肉，我哋好希望可以改變呢種觀念。足球唔單止係男人嘅運動，女人踢波一樣可以好有美感，足球同靚一啲衝突都冇。」