有小美之稱嘅台灣型男賀軍翔因為生得青靚白淨而上位，仲因為拍咗多套熱爆偶像劇《惡魔在身邊》、《呼叫大明星》而成為一線男星，不過因為佢太靚仔，所以惹嚟同性戀疑雲，仲試過同老友鄭元暢傳過斷背情，好彩小美外表陰柔，但名副其實係硬漢子，之前傳出佢同初戀女友翻撻，但佢例牌否認戀情。
超激照片陸續來
最近小美推出第一本寫真集《賀軍翔：南法寄出》，人哋模就鬥少布啫，估唔到小美仲厲害，佢竟然破天荒全裸上陣，仲大出「股」惑，睇到班女粉絲流晒口水。小美咁大犧牲除咗因為出版社斥資500萬新台幣拍外景外，最主要係佢想為自己出道8年留個紀念，所以唔介意豁出去，為咗有完美體態，佢事前狂打籃球、游泳、健身操弗自己。
不過小美始終第一次拍裸照，所以拍攝時佢都要求清場，之後逐件衫除嚟影，難怪佢話：「要玩這麼大啊！拼了！」最後佢只係用被遮住重要部位，稍稍露出結實嘅股邊，佢經理人踢爆仲有小美更激嘅照片，不過要睇大家反應，最後先決定加唔加落本寫真度，咁搞法，似乎小美想借今次寫真吸納更多同性粉絲喎。