唔夠一個禮拜就中秋,唔知香港細定人多,維園賞月地方越來越唔見使,老老實實,屋企有露台天台真係有責任整靚佢俾朋友上去玩!無Idea?參考呢個戶外賞月家具專輯,看圖入貨唔使煩。
記者:朱崇德
攝影:陳盛臣
Model:Betrys、Chinmy@GME
度假椅月餅攤住食
天台唔大,又或兩口子浪漫賞月,一兩張椅夠晒數!呢張SurfChaiseLongueS形設計,完全符合人體工學,試坐,好似成個人被包圍,真係好有安全感,加上椅身30°輕微上斜,曬月光一流。當然,戶外家具仲要講耐用性,ROBERTILGLOOSunNest半月小梳化以塑膠仿藤編織,唔怕日曬雨淋;雖為二人設計,但軟墊可放落地當凳坐,三五知己談心亦得。假如側邊加埋蠟燭、小水池,仲唔十足泰國度假Feel!
12kg摺枱周圍攝
中國人最睇重兩個時節,一為冬至二為中秋,仲唔大條道理成家人上天台食餐勁,一張方便搬動嘅Outdoor餐枱唔少得!一見就愛死呢張ZOWNXL150,僅重12kg,即係一包大米再重些少,但負載力達270kg,膠面設計襟風吹雨打,咁至係戶外家具嘛。
電動天幕遮風擋雨
呢排天氣麻麻,萬一賞月途中嚟場大雨,要走鬼都幾煩!呢個電動式天幕可以一諗,兩邊開到盡,8人大枱都遮得住,最重要係佢為座地式,唔使專登搵道牆去安裝。
戶外大床防蚊堡壘
臨近中秋天氣仲係三十幾度,世界末日未見到,但蚊患就殺到埋身!呢張蚊帳式戶外大床就係你嘅好幫手,大包圍蚊網完全包住塑膠仿藤編織,床底加軟墊,蚊網仲係睇得穿嗰隻,賞月無遮擋。
同場加映:紗綢燈籠當Hit
賞月無燈籠,等於聖誕無聖誕樹!早幾年吹氣、塑膠燈籠大行其道,無晒傳統風情,今年興番紗綢燈,仲係蠟燭版,啲Mood即刻返晒嚟。
a.繽紛園藝(27872203)
b.園藝廊(25533251)
c.ZzueCreation,SunitureShowroom(25529375)