八方真心覺得，香港真係多好嘢食，各國美食，喺香港食隨時好味過在原產地品嚐。CNNGo早前搞網投，公投全世界50大美食，噚日有結果，香港有四種食物上榜，點心最高排第七位，蛋撻第22位，叉燒第28位，蝦餃位居34位。
到港非吃不可
蝦餃係點心，點解獨立成一種食物投票呢？網站冇解釋，但點都好，香港有四種食物上榜，可見「食」力非凡。CNNGo介紹點心時，更指如果到香港旅行而冇食點心，行程就不完美，有不到長城非好漢嘅意味。
CNNGo編輯似乎都幾識食，推介叉燒必須要肥燶先好食，呢樣要求，唔係人人可以堅持。50大美食首位係印尼咖喱牛肉Rendang，亞軍係印尼炒飯，季軍係壽司，泰國冬蔭功、泰式炒河、木瓜沙律分別排第四、五、六位，第八位係日本拉麪，北京填鴨排第九，泰式Massaman咖喱排第十位。
大家想知多啲，可到 http://www.cnngo.com/explorations/eat/readers-choice-worlds-50-most-delicious-foods-012321?page=0 ,0