模陳靜（DaDa）嘅感情生活多姿多采，之前佢同兩個舊愛王宗堯、組合Square成員之一嘅Gary合演新戲《喜愛夜蒲》，王宗堯日前被發現同「浸大咪神」楊梓瑤（Carol）拍拖夜逛超市，態度曖昧，而Gary亦唔執輸，近日有傳佢同DaDa同公司嘅林宜芝（Monna）過從甚密。
打情罵俏
日前Gary被發現孖住Monna喺尖沙嘴行街，雖然全程見Monna同Gary態度未算親暱，但Gary試太陽眼鏡時，Monna忍唔住出手為佢試戴，二人甚有默契。到Monna睇泳衣，Gary明顯有啲尷尬，佢只雙手插袋冇畀意見，Monna可能知道Gary唔自然，睇咗幾分鐘就走。跟住佢哋去睇帽，Gary先回復自然，當Monna試帽時，Gary輕拍Monna個頭，似喺度打情罵俏。
據知Gary同Monna有次出席朋友聚會，經介紹下一拍即合，據聞佢哋成日約會，感情仲進步神速。