文仙尼帶領曼城目前喺英超叱咤風雲，估唔到佢太太費達歷嘉仲勁，以一人之力力抗3個迷魂賊，搞到呢3個賊要夾着尾巴走！
遇蒙面賊冇懼色
話說現年42歲、同文仙尼結咗婚20年嘅費達歷嘉，早前同仔女喺意大利薩丁島嘅別墅小休、而文帥則忙於喺英格蘭領軍嘅時候，費達歷嘉有日喺別墅度突然聽到有人破門，咁佢就好醒，即刻㩒警鐘；之後佢同3個蒙面賊人打咗個照面，但佢完全冇驚，仲大嗌有賊，嚇到3個賊人逃之夭夭。咁仲未算，費達歷嘉趁警察未趕到之前，仲聯同別墅嘅員工，一齊去捉賊，可惜捉唔到。
事後意大利警方發言人話：「我哋證實有人嘗試闖入文仙尼夫婦嘅別墅，不過班賊人被嚇走咗。」據悉，嗰班其實係喺薩丁島一帶嘅慣犯，專門潛入屋之後，用催眠氣體整暈屋內嘅人，然後為所欲為，喺較早嘅紀錄，班賊已經偷走咗值30萬（約384萬港元）嘅珠寶同現金；今次如果唔係費達歷嘉夠機警，可能損失慘重。雖然費達歷嘉今次幸保不失，但就見過鬼都怕黑，決定到英格蘭同45歲嘅文仙尼會合。
曼城玩奧奴夏阿媽？
文仙尼太太費達歷嘉夠英，但係曼城領導層最近就做出令人不恥嘅行為。話說曼城後衞奧奴夏阿媽安東妮雅亦係佢經理人，患癌嘅安東妮雅去信曼城話想解決佢個仔嘅合約問題：「雖然我身體俾癌魔侵襲，但我仍然有能力代表個仔。」點知佢之後收到一封由行政總監曲克間公司寄出嘅email，信中竟然攞佢患癌一事開玩笑！曲克話係有人hack咗佢個account啫，但我求大俠就覺得理由好牽強囉！